「警訊少年係醒目嘅！」可還記得70年代嘉華哥哥主持的《少年警訊》宣傳口號？不論《少年警訊》還是《醒目仔時間》的經典卡通片主題曲，林嘉華代表了70年代小朋友的童年回憶。30年演藝生涯，林嘉華因為拍劇黐爛面而留下疤痕，但他最感遺憾的，還是當年痛失兒歌金唱片。撰文：戴彩煥
在近日播映的《學警出更》中客串演出冷面警司胡Sir的林嘉華，正牌少警出身，但78年由警隊投身演藝事業後，仍跟警察結下不解緣，在過去不少電視劇中，林嘉華除扮演過各式各樣的差人外，原來84年經典劇集《新紥師兄》中，梁朝偉和劉青雲分別飾演的傑佬和fit佬，正是他的寫照。
《新紥師兄》個人寫照
林嘉華：「招振強拍第一部《新紥師兄》時搵我傾古仔，初時我以為咁好搵我做，點知原來係搵我攞料，想了解多啲少警嘅嘢，所以第一集裏面啲人物好活靈活現，因為我將cadetschool（警察少年訓練學校）入面所有人物講晒畀佢哋聽，fit佬同傑佬某程度上係我嘅寫照，而吳孟達當年做嗰個好惡死嘅阿Sir，係真有其人。」第一、二輯的《新紥師兄》，無綫未有找他演出，直至第三輯《新紥師兄1988》，無綫才找他演出大反派，也是林嘉華入行以來的第一次。
細味過去30年演藝生涯，林嘉華最難忘的是由麗的跳槽到無綫的日子。林嘉華：「當年麗的力捧五個花旦小生，我同潘志文、林國雄都有份，我哋各自拍咗條宣傳片，但我條片出咗街半日就抽起，因為麗的收到消息無綫要簽我！嗰日麗的問我係咪接觸過無綫，下晝即刻抽起我條片，又出新聞稿話麗的永不錄用林嘉華，搞到全港記者去晒我屋企，當年都幾大鑊！」
娛樂圈永冇隔夜仇
當年被麗的捧紅後跳槽無綫，難道不擔心被指為反骨仔？林嘉華笑道：「地球係圓嘅，我成日覺得呢個娛樂圈係娛娛樂樂又一圈，係冇隔夜仇。」
過檔無綫後，林嘉華獲派演《發現灣》做男主角，但劇集的反應不單未如理想，且更令林嘉華留下深深的「烙印」。林嘉華說：「呢部係推理懸疑劇，我一人飾演外甥同舅父兩個角色，因為內戰，人人以為外甥死咗，我又炸爛晒塊面，於是我就乘機冒認係外甥爭家產。嗰陣時又要化爛面裝，又要戴住個橡皮面具，又要趕拍，好多時我就咁撕咗個爛面就即刻笠面套，或者即刻化番個正常裝，因為當時天氣熱，加上後生時啲分泌旺盛，面上啲暗瘡好犀利，喺咁嘅情況下，塊面啲暗瘡疤痕嚴重咗，真係歲月留痕！」
黎小田提攜唱兒歌
因為拍劇在面上留下暗瘡疤痕，未令林嘉華感到遺憾，倒是眼巴巴看着明明到手的金唱片從手上溜走，是他人生一大憾事：「黎小田係麗的時期音樂總監，當年《鱷魚淚》重播，公司搵我同潘志文喺錄音室唱主題曲拍宣傳片，黎小田覺得我都唱得下，於是搵咗我錄《醒目仔時間》嘅兒歌，當年下晝有半個鐘頭係播卡通片，我同華娃合唱團一齊唱卡通片主題曲，出咗一盒醒目仔時間卡式帶，入面有《七星俠》、《宇宙飛龍》、《大鐵人》、《巨靈神》同《七小福》咁，當年好受小朋友歡迎；有日小田同我講，話我攞到金唱片，不過冇得上台攞獎，因為呢個卡式帶雖然達到金唱片數字，但國際唱片業協會話冇出過黑膠碟，所以唔能夠攞金唱片！對我嚟講係一個遺憾。」
訪問期間，林嘉華一時興起清唱了幾句《七小福》：「數數手指幾多隻，總數數到十，看看電視睇到我，數下有幾多……」聽林嘉華哼着這些已絕版的經典兒歌，頓時百感交集，對一班70年代成長的朋友來說，何嘗不是一個遺憾！
人物誌：婚後移居加國發展
現年49歲的林嘉華，74年加入警察少年訓練學校，76年畢業後駐守旺角，其間於75年擔任第一代《少年警訊》主持。78年在麥當雄引薦下離開警隊到麗的做藝人，拍過《鱷魚淚》和《巨星》等劇。
林嘉華80年跳槽無綫後拍攝《發現灣》和《阿嬌正傳》等劇，又與陳秀珠主持《體育世界》。84年與曾在無綫任職形象指導的劉寶珍結婚，88年移民多倫多，95年正式淡出香港主力加國發展，擔任電台及電視主持。離港11年的他，去年返港拍攝電影《狗咬狗》及電視劇《學警出更》，今年則參與電影《男兒本色》和劇集《奸人堅》等演出。
