巴塞隆拿上季走樣，今夏大力增兵之餘，仲頒「十誡」（見附表）約束球員。我求大俠中學有個阿sir講過，睇間學校校風好壞，就睇周圍多唔多宣傳語句或禁令，越多就代表校風越差；照咁睇巴塞唔慌好得去邊！
「模範生」慘遭排斥
大家睇完呢十誡，就知點解上季「細哨」會發福兼腳軟、伊度奧會炮轟球會喇！其中紀律最差係幾個好波之人，好似「細哨」成日借故唔操練去健身室蛇王，仲同廸高一齊訓練請假。好多球員仲成日夜瞓，搞到第日比賽變晒軟腳蟹。
最乖嘅就係艾美臣同古莊臣，兩人訓練時特別認真，場外仲係好好先生，唔似其他隊友搞事影響球會聲譽，好似廸高喺倫敦召妓咁！不過，部份隊友訓練時居然對呢兩位「模範生」投以奇異眼光，仲刻意排斥佢哋㖭！
講講吓，我求大俠反而想知道，當巴塞8月嚟香港踢友賽時，會唔會真係守呢啲誡律呢？到時各大傳媒又拍唔拍到佢哋嘅球星夜蒲嘅相片呢？如果巴塞球員到港後照玩照蒲，咁巴塞頒呢「十誡」，咪真係自打嘴巴囉！
巴塞十誡
第1誡 練波要早到
第2誡 健身要事先批准
第3誡 請假要早揚
第4誡 專人監督完成操練項目
第5誡 遵守現行嘅場外守則
第6誡 每晚瞓足8句鐘
第7誡 唔准午夜私離酒店
第8誡 唔准歧視「模範生」
第9誡 唔准挑戰教練
第10誡 唔准攻擊隊友