今屆16位候選港姐噚日去咗澳門名勝大三巴、龍環葡韻等地參觀，之後又去咗賣手信嘅咀香園學整杏仁餅同春卷，再喺木偶葡國餐廳食午餐。
同父母食飯慶祝
原來噚日係7號周美欣嘅19歲生日，大會喺餐廳送上蛋糕為佢慶祝，不過周美欣切蛋糕前喺洗手間逗留咗成十幾分鐘先出嚟，事後大會保母透露佢原來流鼻血。
問周美欣係咪因為有咁多人同佢慶祝，開心過度流鼻血，佢話：「開心就開心，但唔會無端端流鼻血，應該係熱氣。」問佢失驚無神咁流鼻血，怕唔怕喺21號港姐決賽當晚失儀再流鼻血？壽星女話：「嗰日會飲多啲水，同埋會叫媽咪煲啲清熱嘅嘢飲。」佢仲話夜晚會同爸爸媽媽食飯慶祝，但未知佢哋送乜嘢生日禮物，因為仲未收到。
眾佳麗送上寫有祝福語嘅賀卡畀壽星女，18歲嘅2號何傲兒話：「我都想快啲19歲，因為可以經歷多啲嘢。」佢話咁大個女都未去過賭場，所以想見識吓，不過就跟過爸爸入馬場。
