本馬季最後一場喺七月二日舉行，早上九點半已有公眾馬迷排隊入場，當時太陽猛烈，排隊人士難頂烈日當空，但普羅馬迷自火炭火車站落車，往銀禧花園天橋步行到公眾席入口，行成十分鐘，跟住企喺度曬，等成三四十分鐘先至入場，並非一定為賽馬（平時不見有人排隊入場），而係因為馬場有紀念品派。紀念品有咁大吸引力？左丁山都係要見到咁嘅墟冚場面先至敢相信。
馬場內人山人海，等𨋢有排等，後來先至知道入場人數有七萬人，比去年同日多九成。第一場馬看似平平無奇，左丁山攞住隻十三號「勁速猛將」食全餐，結果跑第二，頭馬竟然係一隻不明物體，第一次上陣嘅八號「威力無窮」，爆出七十倍大冷門，條Ｑ分二千七百九十五，左丁山掩住嘴笑。到咗第十一場，下傾盆大雨，左丁山搵隻著名爛地馬二號「搏得威」食全餐（Ｑ、位置Ｑ及單Ｔ），結果跑第三，但第一名係隻無厘頭嘅五十倍冷門七號「我來也」，單Ｔ派九千七百七十一，呢勻左丁山笑得更加大聲，收完錢好輕鬆咁到沙圈睇頒獎與林子祥演唱。
好多馬迷唔捨得走，沙圈看台坐滿人，宣佈最受歡迎騎師係柏寶嗰陣，喝采聲、掌聲此起彼落，可見柏寶確受歡迎，到騎師冠軍韋達出場，咦，噓聲四起，唔少人喝倒采，又會咁嘅？乜馬迷咁唔畀面冠軍騎師呀？然後到揭曉馬王，就係「爪皇凌雨」，馬迷又試歡呼，可見此馬得人心。但係有人不服噃，就係四太梁安琪，據報四太質問馬會總裁應嘉柏與賽事董事BillNader，點解何先生嘅「爆冷」今季贏過「爪皇凌雨」兩次，四月二十九號女皇盃嗰次仲贏成一又四分三個馬位㖭，但選馬王竟然會輸？應嘉柏對《南華早報》話四太唔開心（quiteupset），佢盡量解釋喎。
歷年選馬王，好少聽聞馬主不服嘅，四太鬥心高到冇得頂，淨係睇佢喺四月二十九日之贏馬表情就知，但估唔到高到連選馬王都想贏埋。既然係咁，何生不如買隻歐洲冠軍三歲馬返嚟，一季之內贏清所有香港大賽，保證一定可以做馬王。