香港首次出現IMAX電影院，安排放映《哈利波特──鳳凰會的密令》，除了畫質最細緻之外，片中更有一段以3D立體播放，是嶄新的劇情片觀影感受，以為好醒目地老早上網訂票，原來首周已幾乎全部滿座，票價雖然貴一半，但仍然大把捧場客，可見香港人有幾鍾意試新嘢。
好彩識人有得睇首映，入場前領得免費汽水爆穀固然開心，最令人雀躍的是獲派立體眼鏡一副，製作認真，拍得住PorscheDesign，分大人細路Size，這批眼鏡在當晚才處鏡下海，是為立體眼鏡之初夜。銀幕有幾層樓高，心水提供大家訂位時最好揀選第六行或以上的座位，唔好偏左，唔好偏右，有咁中間得咁中間，寧高勿低，坐得太低的話，要左擰右擰個頭才睇得晒個銀幕。
IMAX大菲林播映本來已經令畫質出奇地立體，畫面中一毫一髮清清楚楚，道具、美術、燈光、攝影、化妝全部冇得偷雞，畫面一角在電影接近Ending時閃出眼鏡符號，院內觀眾期待已久，立即配戴立體眼鏡，該段3D立體播放的全是動作場面，哈利仔跟小巫師同伴們架着掃帚在倫敦飛來飛去，再與反派佛地魔決戰，套用現場小朋友的觀後評語：「Cool,Totally！」
IMAX影院設於城中新貴MegaBox內，觀塘、九龍灣本來是一片工廠之地，如今先由apm打開戰幔，政府又公佈觀塘將會改頭換面，九龍灣大型商場陸續出現，配合啓德機場舊址的大型企劃，試閉上眼睛幻想一下，那裏一帶十年後將是怎樣一番光景。