維他奶噚日公佈截至3月底止全年業績，記招會上，除咗有唔少維他奶飲品，畀記者試飲，仲特登用5月先推出嘅「山水」豆腐系列，炮製幾味家常豆腐小菜，畀記者試食，包括煎釀豆腐、濃湯魚湯魚肉豆腐……淨係聽，都已經流晒口水。
示範食豆腐
維他奶執行主席羅友禮（圖），同好多公司高層一樣，企到台前，親身推介公司產品，不過，佢就輕鬆嘞，因為只係即席試食，大讚好味。記者問佢，最鍾意咩味道，主席就賣花讚花香，話隻隻都咁正，所以隻隻都咁鍾意啦。
噚日，維他奶亦公佈主席同行政總裁職位分開，引起在場記者揣測，問羅主席係咪部署退休，佢就好玄咁話，長遠一定會退落嚟，但目前仍然積極參與公司業務。睇嚟，仲未想退落嚟嘅羅主席，要食多啲豆腐養生喇。
[email protected]