廣播C鍾意唱K，係佢嘅朋友都知，有咁啱得咁蹺，佢一早告咗一日假，晚上唱K，次日唔使返工，於是心情輕鬆，邊飲邊唱，唔覺唔覺就飲大咗，朋友與女士話送佢出門，點知一出到街就有好多記者影相，廣播C下意識地左閃右避，於是成為攝記獵物。佢一返到屋企就向太太匯報。結果次日見報，畀一啲報紙打落水狗，變成親者痛，仇者快，彎晒！
男人如果有心偷食，而自己又係公眾人物嘅話，邊會咁易畀記者捉到吖。一位老友不時陪老細過澳門，唔係佢要去玩喎，而係老細搵佢做遮擋，老細啲女朋友（月月不同）一定行最前面，左丁山位老友行中間，老細一個人行最後，假如港澳碼頭內有攝記恭候影相，只會影到老細一個人單拖。名人最忌與婚外情人拖手拖腳，大無畏咁在蘭桂坊、銅鑼灣、置地廣場行街，衰梗。名人一早講明：「與老婆以外嘅情婦/情人/戀人出街，一定要前後腳，切忌拖手拖腳。」廣播C素來為人老實正派，兼且畀政府昅到實，畀個天佢做膽，都唔敢有意識地公然與艷裝女郎親密地在銅鑼灣出現。
名人喺街上畀大批記者包圍影相，切忌慌張，最好企定定，笑住口咁畀記者影到夠，佢哋要交差，冇失拖啫。名人左閃右避嘅話，好容易儀容舉止不雅，入咗鏡頭，仲難睇。至於與女士一齊被影，好多解釋喎，只要冇與女士攬住、拖住，任你講都得。
一位官場老將為人小心，經驗豐富，凡有真正認識嘅朋友約食飯、唱K、耍樂，佢一定問清楚有乜其他人在場，考慮過後先至應承。到咗約會時間，大家坐低，如果朋友突然帶咗一位未見過嘅人到場，無論男女，並且介紹話：「H哥呀，相請不如偶遇，咁啱我位朋友K又喺度，我請埋佢過嚟，介紹你哋認識。」高官睬你都儍，握完手之後就話突有急事，對唔住，第日再傾，跟住鬆人。點解呢，恐怕他人特登拉關係兼暗中影咗相也。食飯唱K之時，如朋友突然帶埋美女嚟，更加要小心，提早拜拜包無損失。