股價升極唔停嘅港交所話，由噚日起，投資者若果喺佢哋中央結算開咗附寄結單服務嘅股份獨立戶口，就可以透過電子投票方式，直接投票，行使股東表決權，唔一定要親身出席股東會，又或者委任代表、或叫中央結算代為投票咁麻煩。
親自投票唔使靠人
香港地方細，股東如果得閒，隨時可以親身出席股東會，之不過，越嚟越多國企來港上市，佢哋絕大部份會喺番大陸舉行股東會。
而且有啲公司好似康師傅咁，雖則係BVI公司，但唔知點解，堅持要喺天津總部開股東會，咁大家要投票就好麻煩，吓吓要搵中央結算代勞。
𠵱家有咗呢項新服務，就可以自己投票，華華覺得，咁樣能夠提高散戶股東權益意識，仲可以阻嚇某啲上市公司，唔好肆無忌憚亂咁嚟，實在值得推廣。
[email protected]