話明國際都會，身為香港人，英美法德日俄意奧，邊國菜冇得食吖？食到厭，咁熱帶沙漠風情菜又點睇？先試吓德州×墨西哥菜，以辣味為主，玉米可鹹可甜；唔夠喉再嚟多個中東餐，原隻羊烤好任你喫，「中東．德州．墨西哥」，又點只得「沙漠．牛仔．仙人掌」咁簡單！
記者：馮冠芝 攝影：陳盛臣、譚盈傑
中東菜：
海景嘉褔酒店請來中東大廚在7、8月推出中東自助餐，又運來阿拉伯獨特食材，例如叫sumak的香料，入口酸酸鹹鹹，竟然像我們吃的「鼻屎」──碎粒陳皮梅。七味粉混合7種香草而成，又有茄子茸加檸檬做前菜，千奇百怪，讓味覺得到新體驗。
A.中東烤全羊
今次中東菜主打，選用了幾個月大的澳洲羊仔，重10kg！以中東香料醃幾小時，再烤4小時。原隻烤鎖住肉汁，有微辣香草味，可配蒜茸沙律醬，或配上香口的檸檬麻醬，與羊肉互相輝映！想更添中東風情，用手撕嚟食，更正！
B.雞心豆醬配彼德包
中東人以雞心豆醬配彼德包（PitaBread）當飯食！雞心豆磨茸配檸檬汁及橄欖油，豆味濃郁惹味。
C.茄子番茄沙律
同樣可配彼德包，放入口，活像打翻了市場的蔬果架──番茄、茄子、洋葱，再配上香草、薄荷葉的味道在舌尖盪漾，添上最後的芝麻味大千醬，結合成如彩虹般豐富的沙律。
D.香草炸牛肉丸(後)
牛肉粒配上紅洋葱粒、松子，口感有少少似牛肉漢堡，可配乳酪。
香脆菠菜酥餅(前)
用了sumak及檸檬汁調味。酥皮鬆軟，釀入菠菜有咬口，係香口惹味的菜式。
中東風情自助餐：
海景嘉褔酒店海景咖啡廊（訂座：27132860）
日期：1/7-31/8 時間：6:30pm-10:00pm
價錢：成人$278、小童$168（星期一至四）
成人$308、小童$188（星期五至日、公眾假期及其前夕）
地址：尖沙嘴麼地道70號海景嘉褔酒店M層
交通：尖沙嘴九鐵P2出口直行約10分鐘
墨西哥菜：
逸東酒店推出德州×墨西哥半自助餐，沙津甜品任食，主菜可5選1。德國籍大廚HansWergin話，搞德墨crossover菜係因為德州肉類好味，再配上墨西哥的香辣，天衣無縫！香港人未必食得太辣，故部份主菜唔辣，但會配上墨西哥人最愛的墨西哥辣椒，食唔食辣，任君選擇。
1.三文魚配香芒牛油果莎莎
一入場，就會配送這個以芒果及橄欖油調配的餐前小菜。芒果的香甜配上三文魚的鮮味，開胃模式啓動！
2.墨西哥豬柳卷配鮮茄青辣椒汁（5選1主菜）
以玉米、芋頭汁磨成黃色及黑色的軟皮，包裹着以墨西哥香料醃製3小時的豬柳。外皮軟腍之餘帶有玉米或香芋的甜味，更襯出豬柳的香口，實在太好食啦！
3.墨西哥鮮果玉米餅
墨西哥菜好鍾意用玉米，今次就甜食，外皮脆卜卜，入面夾咗用磨碎的鮮果、椰絲混合的乳酪，由於鮮果不是磨成茸，咬落有粒粒口感，好得意。
4.香橙美式燒羊肋骨（5選1主菜）
羊肋骨要燒2小時，肉質軟腍，仲散發陣陣香橙及燒汁味，又fresh又香！
德州墨西哥半自助餐：
香港逸東酒店咖啡閣（訂座：27101863）
日期：1/7-31/8
時間：6:00p.m-9:30p.m
價錢：預先致電訂座，成人$198、小童$158
（Walk-in價，成人$248、小童$178）
地址：九龍彌敦道380號
交通：地鐵佐敦站B2出口直行約10分鐘
