喺娛樂版見到Do姐鄭裕玲並唔出奇，但佢喺財經版現身，都算罕有。Do姐今次公開投資致富之道，都係多得渣打銀行。
話說渣打重新推出財富管理服務，一早重金禮聘Do姐做推廣活動嘅特別嘉賓，點知活動延期，Do姐唔係二打六，傾好幾時就幾時，合約係佢搵自己律師訂嘅，冇得改。酬金Do姐就袋咗，既然渣打畀硬錢，點都要善用資源，結果Do姐就喺財經版大談理財投資之道。
收1蚊支票最蝕底
Do姐同華華講，經常聽到有演員拍完劇收唔到錢，所以每次接job，都會自掏腰包請律師代訂合約。縱橫娛樂圈多年，Do姐不但冇俾走數，好多時仲收凸，皆因「嗰時想搵我拍戲就要落定留住檔期。」有時部戲胎死腹中，定金自然袋袋平安。
不過，咪以為Do姐咁精明就冇蝕過底，當年佳視執笠，佢同同事遊行抗議乜都做齊，仲係收唔到人工同遣散費，直到多年後某日，突然收到張銀碼得1蚊嘅支票，原來係佳視清盤，分晒畀債權人後剩番分畀員工嘅錢。Do姐話：「梗係唔兌現啦，最後連張票都唔知喺邊！」
[email protected]