中石化同大股東中石化集團，上個月22號點解突然換老總，到呢分鐘華華都搞唔清，而內地傳媒對呢件事嘅分析竟出奇咁少，唔似對其他公司，一個董事換咗都用放大鏡研究，要知道，中石化賺嘅錢雖然拍馬追唔上中石油，但喺大陸嘅地位，大家一向叮噹馬頭，所以，內地傳媒近乎鴉雀無聲嘅反應，可謂極之唔尋常，一向相對勇於披露官場貪污事件嘅《財經》雜誌，噚日終於將個黑紗掀開小小，華華覺得好可能又係一套《宦海奇情》嚟。
原來6月22號下晝3點鐘，中石化集團忽然話要召開總部機關同埋在京所屬單位黨政主要領導幹部會議，據《財經》話，咁好自然，所有高層包括事主前老總陳同海都要現身啦，點不知，老總主持個會時先知係宣佈集團換主要領導，仲係由蘇樹林接替自己出任總經理同黨組書記，到最後一分鐘至知被炒嘅陳同海，跟住就走出會場，再冇返過嚟。
到咗傍晚，中石化集團火速召開全國電視電話會議，啱啱接棒嘅蘇樹林即刻表態，話深感擔子好重，壓力好大，「更深知任期有限，責任無限。」
出身寒微 平易近人
對於呢位新老總，《財經》話，蘇樹林出身貧寒，62年喺黑龍江一個普通農民屋企出世，14歲時父親病故，由母親帶住7兄妹艱難度日，不過佢好爭氣，喺石油系統嘅大學畢業後，83年喺中石油旗下大慶油田開始做工程師，最後俾同樣嚟自大慶油田嘅中石油前老總馬富才賞識，立心將佢培養為接班人。
之後劇情人算不如天算，04年開縣發生井噴事故，馬氏提前被調走，由陳耕接手，接班人嘅嘢，自然由陳生提議，到咗06年9月，蘇樹林調去遼寧省，做省委常委兼組織部部長，兩個月後，中石化就宣佈由蔣潔敏坐上第一把交椅。
世事就係咁，失之東隅，收之桑榆，陳落馬，蘇得以空降中石化。《財經》話，識得佢嘅人，無一例外用「嚴謹兼行事幹練有魄力」形容佢。啱啱接手一個禮拜，蘇樹林就去咗北京燕山石化視察，同大大小小員工握手，畀人感覺平易近人兼周到，立即喺中石化職工心中加唔少分喎。
[email protected]