澳門祥泰（199）資產雄厚，股價大大偏低，5月推介過兩次，5月中一次當時股價0.55元，5月底第二次時上升到0.70元，到6月中，股價最高升上0.86元，之後調整，上周五由低位回升，收0.67元出現強烈轉向訊號，又係上車機會，今次升幅會更大。
祥泰調整，上周三最低落到0.57元，同高位相比，跌咗33.7%，幅度無疑係大咗，但上周五一支陽燭反彈，高收0.67元，升番9.8%，現時10日同20日線在0.69至0.70元水平，只要破位而上，調整就確認完成，再展升浪。
睇遠啲，去年4月中，祥泰高位0.72元，之後1年多，走勢成個大圓底，低位0.335元，呢個係典型嘅收集形態，上月中大成交破頂而上，跟住後抽整固，幅度雖然較大，但唔排除係大戶營造大攻勢之前最後的一次震倉，升浪一再起，以大圓底形態的量度升幅計，上升目標起碼見1.10元，預期升幅有64%！
明年開始進入收成期
股價要升，一係有業績支持，一係有前景支持，祥泰係後者。祥泰現時在澳門有一個超大型的發展項目，在內地又有收益好勁的多個發展項目，08年開始，將陸續進入收成期，祥泰現時市值只係17億元，若以後每年都可以賺幾億元，股價翻1倍，甚至升上2元水平，都唔難。
澳門路環項目總樓面超過820萬平方呎，已同澳門政府達成5.6億元的補地價協議，正式可以動工，分4期發展，祥泰佔整個項目32.5%權益。首期興建4幢住宅，樓面150萬平方呎，全部出售後，祥泰嗰份起碼可賺5億元。成個澳門項目落成後，祥泰保守估計起碼賺超過20億元，呢條數仲大過公司嘅市值。
另外一樣咁煞食嘅內地發展，家吓公司就擁有5個高爾夫球場同住宅項目，短期內仲會收購多兩個度假村，目的係要成為全國首屈一指的高爾夫球會發展商，呢一瓣前景好勁，聽講有大行已睇中佢，潛力一被發掘，股價就會爆升。