傳統左派的想像：「根正苗紅」，還有傳說中：「為國為民」的情操，我們的新任民政事務局長曾德成一一俱備，而且那份冷靜沉着，配合少年的激情，英勇浪漫的過去，更得中共細心栽培幾十年。養兵千日，一上台就當起我們的「文化部長」，以文化藝術大內總管的身份，包辦賭博、體育、保育、官民關係、公民愛國教育、基層民情，究竟佢係壞人定好人？同我哋命格夾唔夾？實在有必要在他有所行動前，盡情想像，先一步揭開神秘的面紗。
記者：馮敏兒
曾德成一隻左手外露，右手插袋，你見到的是左手，但做嘢或收埋的是右手，英式紳士的格、農民的赤腳、紅領巾、西裝大領剪裁、中山裝衫袋，而且手執共產黨承傳象徵「紅燈」（出自樣板戲《紅燈記》），越睇就越似，難道佢就係達成中港共融的未來特首？
幻想出來的文化部長
從沒幾人認真留意過這個人，67暴動時因為派「煽動性」傳單而入獄兩年，他一上台，政府就講到好似不計前過咁，但有趣是身為政治人物，當然要講身家清白，「根正苗紅」才是選民基礎，歷史不可能冇關係，況且「政治犯」非但不是一種過，反而是優點，只係唔想你去冧另外一啲關係啫！例如佢個元老級左派父親曾照勤兩年前去世時，李嘉誠都有出席喪禮、同胡錦濤熱情握手、前《大公報》總編輯……高舉過言論自由，令人充滿無窮想像。
右腦掂啲
蘇民峰批：藝術水平勝何志平
倒不如找鬼馬神算才子蘇民峰批命更實際：「其額上左右有太陽骨，對藝術天份有幫助，應遠勝何志平。因為上停掌思想，下停講享受，何志平下停飽滿，較注重個人物慾享受，所以衰在貪威識食，論藝術還要看眉骨和太陽骨。」有相為證，傳說中的何志平有得食總一馬當先，對文化界就交白卷！反之蘇民峰話睇到曾德成有藝術天份，撐行企佢右腦嗰邊！但亦不忘補充：「不過有藝術天份唔代表佢一定係畫家！」
紅領巾飄逸
藝術家馮美華：好浪漫的一個人
兆基創意書院創意總監馮美華對曾德成異常樂觀：「你要公道地對待這個人，原本的左派其實對人類嘅關心最多，當年讀咁精英的學校（聖保羅書院）都可以咁左，我就覺得好精采，充滿理想主義，好浪漫。佢為人實幹低調，更令我覺得佢真係做嘢嘅人，值得尊敬，我唔會擔心佢對藝發局嘅影響。或者許多人會認為佢左派，會搞『統戰』，但大佬，我哋其實真係唔多接受中國喎！自己都要反省吓喇，我哋嘅背景令我哋唔愛自己嘅國家，係一種悲劇，如果從國家嘅角度去睇，讓我們更多地心向國家，也不為過。文化藝術方面他至今仍深藏不露，但曾德成是曾特首的文膽，文學有一定深度，一定唔會比何志平差，因為何志平根本就唔關心香港嘅藝術發展，你睇吓佢搞親都係節目導向，如賽馬會創意藝術中心、亞洲文化論壇之類，出盡風頭，但有邊樣嘢係有策略，長遠地栽培香港嘅藝術？本來可以好強嘅藝發局，到頭來完全節目導向，你睇撥款就知，全民派餅仔，個個唔得罪，到頭來個個唔夠錢，人人三不像。香港的確需要更進取，否則就會被文化藝術全面開放嘅新加坡超越，只有相當豐富嘅文化活動，才能吸引叻人留低。」
隱藏
前《新晚》老總羅孚：冇品味有文化？
個人嗜好品味決定文化藝術取向，最少都會有啲主動，提起80年代的左報如《大公》、《新晚》，文化版受到江湖肯定，故非常賣紙，連長毛都話好睇，佢仲念念不忘當年《新晚》的「風華」思潮專欄，還有《大公報》的「大公園」。而當年最有名的便是《新晚報》老總羅孚，佢咪係曾德成嘅上司兼恩師囉，究竟曾生有冇品味？文化愛好？佢都應有所了解，點知對下屬甚為欣賞的他，卻在訪問中說：「唔察覺佢有任何藝術愛好喎！平常衣着一向沉實樸素。」講到品味竟出現一幅素人畫像，難道他沉靜到甚至不談文藝？收收埋埋的右手是最佳擺位。
左腦發達
尊子：佢有好多秘密通道
左腦主理性判斷，大概尊子眼中曾德成還是左腦發達一點：「我覺得佢嘅藝術觀，或者社會文化觀，應該頗為保守，尤其對流行文化。起碼冇乜開創性，畀唔到我哋乜嘢大Vision（願景）。他的責任不會是文化的開創，而是如何管理。佢有好多秘密的通道，佢身份複雜，在局中絕對唔單止是文化上，最重要是監察曾蔭權。而且佢企位唔錯，做唔做嘢都冇所謂，唔會出大問題，唔似金融、環保後果可能好大鑊！」
黃英琦太平紳士：有文化！
黃英琦在中央政策組做兼職顧問時，直覺曾德成是個知識型的人。從文化修養來說，其說法還是令人想入非非：「我感覺上佢說話中肯，唔覺得佢係戴好多有色眼鏡睇嘢嘅人，我睇到佢都關心文化，了解箇中重要。」不過她亦同時發現「平等機會委員會、人權、種族和諧等等，都在新班子下，過了檔去林瑞麟的政制事務局上，才非常不可思議！」
篤背
無政府主義者莫昭如：背後有勢力但唔知冧乜？
「同佢大佬比是曾德成左啲，還是冇咁左呢？」無政府主義文藝老青年莫昭如說：「如果他是真誠的社會主義者便應熱愛勞工，如陳婉嫻般真心，只是到某個時候會以大局為重。我覺得最好問佢還相信毛主席嗎？對文化大革命、對種族主義，甚至哲古華拉點睇？中國要求香港如何改變，他是否可以唔聽？我從冇留意這個人，但我睇到佢背後有各種唔同嘅勢力，佢支持完四人幫，又支持過華國鋒、鄧小平，佢睇嚟唔似許家屯、程翔般對黨有懷疑，我唔知佢內心有冇，但表面上就永遠跟隨當權派囉！總之佢兩兄弟感覺上都係差唔多，論組織力，民建聯搞長者旅行，請客食飯就最叻。」
批左
街頭暴民長毛：佢係共產黨員！
「我肯定佢係共產黨員，除非佢發誓否認。特區政府唔畀人搞政黨政治，因為特大黨會慢慢接管。大家亦唔好誤會，當年佢參加暴動，為自己的信仰鬥爭唔係恥辱，但今日佢唔係，係參加咗一個鎮壓人民的政黨，這才是問題。」長毛更危言聳聽：「香港冇中宣部，以前何志平唔識做，唔敢做，好似『沒有共產黨就沒有新中國』你叫何志平點講，想做都做唔出喇！共產黨係乜，曾班子的『港英餘孽』冇人知，咁點宣傳啫？所以曾德成是突破，但佢嘅工作只是文化定調，決定邊句講得，邊句唔講得。就算佢真係一個有心人也不成，因為佢係共產黨員，有中共就冇自己，唔係佢悲劇收場，就係香港人悲劇收場！」不過曾德成早就話過，長毛是托洛斯基主義者（托派），同認史太林做阿爺的中共，是世仇，點會有偈傾！果然係真嘅！
天將降大任於斯人
5大問責重飛
有人話如果「男主外，女主內」，咁「女人的事」就是他的份內事，咁這批家事就最少有以下數大領域：
1.08北京奧運全力撐
包括在港招募義工、馬術比賽等都將是他的重要任務，所以話曾德成是國家級的。
2.馬術比賽
08奧運馬術比賽和香港的賭博賽馬事業都歸佢管。
3.本港體壇發展
佢會否如國內般重視運動員？黃金寶，請你現在就大聲說出十個願望吧！
4.皇后點收科
何志平話咗唔要原地保留皇后碼頭，曾德成難道會順應民情？
5.西九下場?
西九龍文娛藝術區佢從未講過一句話，難道佢就係最後的秘密王牌兼命中注定佢冇得卸膊？
身為文化藝術大內總管，曾德成咁嘅打扮，搵「白毛女」同佢做對手戲，係咪覺得非常登對呢？
正在牛棚藝術村展覽至7月29日的「10年回歸前後話」展中，一件由鮑海倫和劉掬色合作的作品。算是結案陳詞。
