孫柏文作為一個肥仔，平時食飯都會揀擇啲，大家唔好誤會係揀飲擇食，只係希望可以食好啲。橫掂都一樣嘅卡路里，就當然希望有最大感官刺激回報。不過，噚日因為工作關係，要去到一間公司canteen食午飯。好彩，呢個canteen係由大家樂集團（341）嘅子公司管理，所以仲有佢哋嘅旗艦產品，「一哥焗豬扒飯」可以揀。
去到canteen嘅時候，咁啱撞到香港女性典範，隔籬理財版《敏妮talk》嘅溫敏妮。見到靚女，孫柏文嘅自然反應，當然係走去媾媾佢。點知，就見到溫敏妮手腕好似有事，佢話係肌肉勞損，我諗分分鐘係CarpalTunnelSyndrome。佢仲話，自己已經成為《鹿鼎記》裏面嘅「獨臂神尼」，不過係現代版，「獨臂敏妮」。面對港女，我當然步步為營，所以都冇膽讚敏妮佢連自嘲都「好港女」咁毒。叫自己「獨臂神尼」，唔通話自己不但四肢不齊，仲要攻擊港女死穴，話自己好似啲尼姑咁，嫁唔出？
試吓新嘢？！
敏妮同我就一齊排隊，去到收銀機，我話要「一哥焗豬扒飯」，點知，個收銀哥哥話冇「一哥焗豬扒飯」，淨係得「一哥焗雞扒飯」。
What？焗雞扒飯？我問佢點解，佢話公司想試吓啲新嘢。
乜話？攞旗艦產品試吓新嘢？就好似將《蘋果日報》嘅風月版，變成畀「同志」睇，唔係話冇市場，不過市場真係細好多。
講真，冇焗豬扒飯嘅真正原因，係因為canteen同敏妮嘅公司，有價格管制協議。焗豬扒飯成本之一嘅豬肉，價錢上升時，又不能轉嫁畀消費者，就當然會出現計劃經濟當中最常見嘅短缺問題。豬肉喺特區，都係因同一問題出現短缺，養豬成本節節上升，不過豬農又不能轉嫁成本畀五豐行，咁就當然唔供應。
仲係能源概念股？
養豬其中一個最大嘅成本，就係飼料。而因為豬肉係我哋中國人不可缺少嘅食物，為減低豬肉價，祖國政府一定希望見到飼料價格下跌。所以孫柏文一向對祖國「糧食變能源」概念股，存有戒心。好似中國糧油（606），話雖然國家宣佈停止所有新嘅「提煉乙醇」計劃，中糧啲計劃唔知可唔可以繼續。
今日我就放長雙眼，睇吓中糧可唔可以繼續煉乙醇，仲可唔可以叫自己做能源概念股。
金手指網誌： http://phatdat.blogspot.com