97年是香港的轉捩點，連鎖化妝品零售商莎莎國際（178）在這一年上市，距今十年，莎莎主席郭少明跟香港其他零售商一樣，捱過最艱難的金融風暴、沙士，享受過CEPA、自由行的甜頭，面對經濟起伏不定，他說：「只要係大圍嘢，就唔使咁灰，只要唔係自己出問題，唔好嘅嘢，一定會過去。」
97年前，香港一片歌舞昇平，莎莎亦將預備了兩年的上市計劃付諸實行。郭少明回憶說，上市集資是為了拓展台灣、星馬等海外市場，但上市未夠半年，「金融風暴就好似一盆冷水淋過嚟，短短半年，香港遊客冇晒，新開拓嘅市場又未站穩陣腳。」金融風暴前，莎莎有40%生意來自來港旅客：30%來自日本；10%來自歐美，以及東南亞各地。
金融風暴擴充攻本地客
面對門可羅雀的局面，郭少明不但沒有縮舖裁員減開支，反而把心一橫轉攻本地市場，連開10家分店，「企喺度等冇用，冇遊客就做local（本地）客生意，以前搵舖揀遊客區，金融風暴要做local客，就揀荃灣、沙田local客地區，搵啲啱本地客嘅貨賣。」
變──就是出路。「多咗港客，莎莎守過咗金融風暴，營業額冇減。做零售，營業額冇減好唔簡單，我有信念，之後一定會好！」
可惜捱過金融風暴，下一場仗更難打，「喺香港做生意幾十年，面對過好多次經濟起落，金融風暴有得望佢會完結，但沙士冇人見過，會死人㗎！」不但莎莎門市，幾乎整個香港當時都變得死寂，「冇人有心情化妝，個個戴口罩，連唇膏都唔使搽。」
「當時有家老人院打電話畀我話，郭生你好人，可唔可以捐啲口罩畀啲老人家，佢哋惹到沙士死梗㗎。」當時郭少明再次把心一橫，「橫掂冇生意，採購部同事都冇嘢做，我動員全個部門，去全球搵合規格嘅口罩同清潔用品番嚟。」
變──就是出路。今次莎莎由賣化妝品變成兼賣衞生清潔用品，不但令莎莎業績不用虧損，郭少明送口罩給老人院更贏得名聲，「𠵱家老人院仲時時打電話嚟，問候同多謝我。」
沙士賣清潔用品賺錢
沙士最後都「overcome（克服）」，但香港經濟慘遭蹂躪，零售業更是奄奄一息，「當時好多公司分店減吓一間、減吓又一間，慢慢就冇咗。」為了不灰飛煙滅，郭少明再次逆市擴充連開7間分店，「沙士之前，同事已經做過統計，發現大陸遊客佔生意額兩成，所以我喺遊客區開大店舖，銅鑼灣恒隆廣場個舖，就係當時租落。」
結果莎莎與其他香港零售商迎接了美好的時光，大陸放寬內地居民自由行，加上廸士尼主題公園，大量中國遊客湧港，莎莎成為自由行必到的掃貨地點。
2000年莎莎為了趕上中國熱，曾經找了大陸夥伴伊貝佳作「盲公竹」，以為可以直搗大陸市場，結果，賠上1800萬元學費。中央送予港人的另一份大禮──CEPA，令曾經一心進軍大陸的莎莎，捲土重來。
在香港做零售，從來都不會長久享受美好風光，自由行、CEPA雖然令莎莎盈利年年增加，但地產商卻要分享很大的一杯羮，「租金升係好事，做零售嘅，邊個想好似97年後至2000年咁要減租，但最近租金真係加得有啲過籠。」
租貴積極拓品牌代理
盈利被租金蠶食，郭少明再度要變，「其實莎莎一直有代理品牌，𠵱家我哋更積極去做，將個部門改名為品牌管理，𠵱家我哋獨家代理超過100個牌子，唔講你可能唔知，淨係呢部份嘅生意都成9億元，係香港最大代理商之一，佔莎莎整體生意額三成半，我希望再增加多一啲。唔係我哋賺多咗，只係想呢方面增加嘅生意，可以用嚟填補舖租增加。」
不斷轉變只為「適者生存」，不過，郭少明仍然樂觀，「任何一段時間，都可以利用，有危就有機。總之喺任何環境，都要諗──機會嚟喇！」
