Car通：斯文女揸寶馬　有尾飛陀

呢日，C記偷聽到兩個美少女嘅對話。「我鍾意佢。鍾意佢體形小巧夠靈活，溫柔又有啲儍氣，仲會陪住我呢度去嗰度去永冇SayNo，啱晒我三大要求!」「咁仲唔上？」「我梗係上硬啦！你都一齊吖？」「吓，一齊上？」係囉，咁都得？「係呀，睇睇我架新車！係咪你都好啱上呀？」吓，睇……哦，原來係BMW120iA。

記者：黎頌詩
攝影：陳陶鈞
Model：雪

竟然CuteCute哋

橫睇再掂睇，佢都唔多似寶馬。喺我心目中，BMW應該係斯文得嚟又有啲型，呢架120iA，冇咗尾，車身短咗，賣嘅其實係SportsHatchLook，不過睇落竟然有啲CuteCute哋，所以自從推出以嚟，一直都被認為係Fit晒女仔之選。今次新版登場，睇外觀，改動嘅地方不大，如果唔係問多兩句車行師傅，真係唔係好睇得出。原來線條稍稍上揚嘅鬼面罩變圓咗少少，難怪睇落似乎可愛咗，而最唔同嘅係霧燈，由圓變方兼且大移位，型咗。小巧靈活，一直都係寶馬1系嘅優點。記得我C記仲係新牌仔嗰陣，就係因為泊車，老竇架愛車就咁俾我搞到體無完膚，佢鬼咁肉痛差啲要殺人。所以細車有幾可愛，相信新牌仔就最清楚，120iA嘅捧場客，除咗美少女，應該都唔少得新牌仔。

■新一代120iA雖然比上一代增加6匹馬力，但真係唔多覺囉！

■睇真啲，鬼面罩比舊版圓咗，霧燈嘅形狀同位置都大執過㖭!

■尾燈線條比舊款幼細，但整體觀感不變。

細車唔侷促

講過好多次，我最憎細車，唔係因為自己唔係美少女、亦唔關係咪新牌仔事，而係我成日覺得細車嘅內櫳好多時好侷促，真係未開車都好似見頭暈。不過工作嘛，無論大細車，都要認真試一試。咦？坐落司機位，佢一貫嘅仿桶形設計係勁舒服；唔覺侷促之餘，兩個座位中間仲有個手枕，聽講話係新版先有。睇嚟我都要改變一下對細車嘅偏見……不過，原來真係有得必有失，前排舒服後排就有啲閉翳，真係只啱美少女，大隻佬會好辛苦囉！好彩個尾箱都叫做攞番啲分，車細細但都算幾闊咁啦！再睇個中控台，鋪排無咩大變動，只係喺左右兩邊加咗獨立,恒溫冷氣，叫做高級咗啦！

■後排座位較窄，阿雪咁瘦都係啱啱好，重量級人士肯定坐唔落，中間位更加要分腿坐㖭。

■仿桶形座椅，掟彎都坐得穩穩陣陣，為內櫳加添幾分跑味。

■新增嘅手枕打開仲可以貯物，用途夠多樣化！

■中控台鋪排不變，簡單得嚟夠齊全，新版本更換上獨立恒溫冷氣。

美少女變辣妹

1系係寶馬嘅入門車系，而又以120iA嘅規格屬最初級，我會用「溫柔」嚟形容120iA。156匹嘅馬力，踩起油上嚟引擎聲明顯比130i寧靜，聽唔出嗰種充滿力量嘅感覺。不過如果你以為佢辣唔起，就大錯特錯。因為冇咗尾，車身輕咗，2.0公升引擎帶嚟嘅動力一樣不可小覤。120iA嘅Steptronic半自動系統無加減波撥片，個人覺得用波棍換檔更有手波Feel，加上波箱轉檔反應相當敏捷，加速拖波都過足癮，美少女隨時都可以變辣妹！稍嫌不足係可能車身較輕，行車嘅穩定性有待改善。