花旗上禮拜五好掂,股市升、油價升、金價都升,連CNBC嘅主播都講到好興奮,國內股市上禮拜五喺絕地反彈,斷估反彈都唔會咁短癮,港股一舉突破22500關,藍籌股好似要吐咗一啖好耐嘅鬱悶氣咁,如果掃得狠,恒指今日就已經可以逼近23000關。
睇吓呢幾日啲財經版,大家就知道大行對長和系幾有憧憬,個個話長實(001)落後,和黃(013)嘅3G業務有起色,當然唔少得擦吓誠哥鞋,話佢好醒目,之前一段時間密密增持,𠵱家仲唔肥仔過肥仔!
和黃C輪9174:啲藍籌股耷咗咁耐,party啱啱開始,起碼都會升多幾日,無論從成交、走勢、消息同情緒,都係買長和最值博,𠵱家大行話和黃3G嘅EBITDA有機會唔使見紅,只係呢樣嘢都可以炒高20元,唔怪得知大行話和黃股價睇100元,和黃上禮拜五升咗上嚟83元,再升嘅空間好吸引,一於買啲和黃C輪9174。隻輪上日報收77仙,槓桿率10.8倍(有效8倍),正股升上100元,9174會喺2.30元樓上,就算正股升到90元,隻輪都有近8成升幅,正股跌穿80元止蝕。