若07年尾要數潮流十大奇閒，相信「I'mNotAPlasticbag」必列榜首之位。老老嫩嫩個個都話要，知道佢Hit、知道佢萬眾期待，亦知道必定會係又一排隊之作，但怎也估不到變成幾千人大鬧中環、品牌受盡千夫所指，輸家一籮籮。個袋eBay上已炒至美金300大元，而香港就只有極少數人可以在這幾日憑籌買「寶」，計我話，事件搞到咁𤓓，以下5位都是輸家！
記者：許維雅
攝影：林栢鈞
提前派籌釀災難
今次開賣，最混亂係中環。早於發售前兩日，已經有人龍圍剿商場，最後警方插手，店舖被迫派籌，沒籌的買不成，結果才釀成大混亂；其次係ifc，人群互相指摘。而5間商店之中，唯一可以開門讓人龍有秩序攞籌的就只有利園Anya專門店。不過，眼見其他分店失守，最後都惟有齊齊派籌唔賣袋。
第1位：HarveyNichols少做一日生意
中環置地廣場俾人龍圍剿，最後搞到封商場，附近商舖想做生意都難，而HarveyNichols同ThreeSixty更封店一日！中環地租價格向來首屈一指，無喇喇唔見一日生意，可謂重創！
第2位：AnyaHindmarch形象受損
人人矛頭直指Anya，更搞到登報紙發聲明。Anya低估了情況係失當，但做人要公平點好，情況如此混亂，都需要管理公司同警方的配合「才能搗亂」，難道人哋有袋想唔賣畀你乎？
第3位：炒家有貨放不得
人人都知「I'mNOTAPlasticbag」的升價力強勁，更成為多個拍賣網站的最熱門搜尋。不過，不少人因為買袋不遂上拍賣網站搞事，多個交易都俾人將價格推至幾十萬。炒風係不能助長，但難道搞亂檔就可以大條道理？
第4位：請假買袋得個桔
不少人提前兩日排隊，最後絕大部份買唔成，白捱一夜、白掉一日人工。而就算你排到，二手店都話唔收，米蘭站（Tony）：「我哋唔會收呢個袋！個袋雖然炒力強勁，但其實冇乜價值，有價冇市，更加唔係我哋Target。加上近年Anya牌子嘅袋承接力一般，我哋寧願收番Chanel呢啲穩陣牌子好過。」
第5位：上網落定買袋，懷疑被騙
賣袋第2日，已經有很多網友上網討論，更有人懷疑受騙。其中一位網友發起問「有冇其他人於Yahoo拍賣搵某個賣家訂袋」，結果發覺落定的人都不少，有人更無法聯絡上賣家。買唔買到袋都係未知數，定金會唔會石沉大海都有排驚。
其實Anya今次有賺！
「我唔會用呢個袋，因為唔係我Style。
「啲人咁瘋狂可以理解，因為個袋已經超出咗$120嘅水準，但又未至炒到2、3千蚊個。環保袋Hit係咪因為大家開始着重環保，我唔敢講，但我會記起MartinMargiela講過『我出AidsTee對於真正對抗愛滋其實作用不大，但呢一個係好嘅開始。』環保意識係要用時間累積嘅。我唔覺得Anya會因為今次事件損名聲，佢今次必定係有賺嘅，起碼贏咗Noise同新聞性。我更加唔覺得佢哋有咩失當，因為每次派米、換水晶麻雀嘅事件都係咁，啲人換唔到實鬧，實發爛渣！」
Anya秋冬正價貨最平$8,000
一個環保袋令AnyaHindmarch人氣大升。其實Anya於24歲那年獨資自創品牌，短短10年內，品牌成功進駐紐約、東京、巴黎、香港等城市。買唔到環保袋，不如立即搶先睇今個PreFall系列。
最新一季主打IconBag：
左：ShoulderMackeson金色軟皮手袋$9,400
右：Lautner黑金色混皮手袋$9,600
奇聞！用Anya袋喺eBay搞抽獎
個袋於eBay已經被Bid上了300美元，瘋狂程度犀利，最騎呢係有賣家利用50份禮物形式給人用20美金Bid，但聲明50份中只有一份係「I'mNOTAPlasticbag」，其餘係賣家自己隨意所送的禮物。如此網上大抽獎的確少見，但一樣有人上當！另一方面，亦有人在eBay販賣「買Anya袋購物指南」（BuyingGuide），美金$15一份教你去邊度搵個袋買，結果亦一樣有人投標！真係奇聞。
小心！網上有假貨
呢個Hitbag如此受歡迎，奸商必定不會放過製翻版貨的良機。拍賣網已經有人放緊聲稱韓國製的「I'mNOTAPlasticbag」，有紅色同藍色，但水準十分低劣，卻賣500大元，結果當然沒有人上當。
店舖查詢：AnyaHindmarch（22347788）
中環ifc國際金融中心2055號舖