喺立法會代表金融服務界嘅「金勞詹」詹培忠，上周五自爆頸部有腫瘤，家吓做緊化療及電療後，噚日股市一開，金勞詹嘅股票王國，市值即刻縮水。
成日牙擦擦嘅金勞詹，其實唔係得把口叻，投資都有啲心得，所以亦有「金牌莊家」嘅稱號，佢喺股市嘅活躍程度絕不比四叔彤叔弱。華華睇番資料，佢家吓持有超過5%股權嘅股份有六隻，佢對細價股似乎情有獨鍾，隻隻股價都係毫子股，唔使一蚊。
毫子股威力一樣猛
不過，毫子股嘅威力不容忽視，有四間公司佢或者佢嗰仔做大股東，包括中富控股、正輝中國、北京時裝，同埋建星環保，前三者都係揸住差不多27%，而建星則揸住31%。加埋另外兩隻北方興業同埋馬斯葛，全部都係毫子股。
受到金勞詹病重嘅消息影響，除咗馬斯葛叫做升咗少少（1.9%）外，其餘五隻股噚日收市全部碌晒落嚟（見附表），埋單計數，金勞詹嘅股票王國市值蒸發咗成3000萬銀。
另外，根據金勞詹向交易所嘅申報，佢揸住香港體檢同埋駿雷國際少過5%，前者跌、後者升，但華華聽聞佢已經沽晒呢兩隻股，所以升跌應該同老詹無關。
最新增持北京時裝
金勞詹最新做大股東嘅公司係北京時裝，本嚟揸住18%股份，6月底佢以每股兩毫七，接咗北京時裝主席手上接近6000萬股嘅貨，先至將股權增至現時嘅27.7%。
不過，牙擦擦嘅金勞詹好樂觀咁講，期望10月立法會復會後再蒲頭，佢一蒲頭，啲股係咪會升番呢？
[email protected]