麥廸文（MattDamon）近年嘅代表作肯定係《叛諜追擊》（TheBourneIdentity）系列，佢扮演一個機智又令人感到無奈嘅失憶特工，套片仲為間諜片帶嚟新氣象。麥廸文今個夏季帶同影迷好期待嘅《叛諜追擊3：最後通牒》（TheBourneUltimatum）為系列寫下完結篇，今集佢飾演嘅特工，決定要走遍全世界，目的就係重組記憶，搵番自己嘅身份，仲要作出最後反擊！ 撰文：戶川淳
下個月9號正式喺本地上映嘅《叛諜追擊3：最後通牒》，係《叛諜追擊》系列嘅最後一集，識貨嘅影迷都知頭兩集《叛諜追擊》同《叛諜追擊2：機密圈套》（TheBourneSupremacy）緊張刺激，動作設計嶄新兼劇力萬鈞，喺全球取得驕人票房成績，令人對只有一副娃娃臉嘅麥廸文另眼相看。
誓揪出幕後黑手
今集講麥廸文呢個美國中情局訓練出嚟嘅職業殺手積遜龐（JasonBourne），只想靜靜咁消失喺人群當中，但佢不斷遭中情局派員追殺，佢唔止失去記憶，仲好慘咁失去唯一心愛嘅女人，悲憤莫名嘅積遜無懼最先進嘅武器，同埋四方八面嘅狙擊手，勇往直前，從莫斯科開始呢次冒險旅程。途中麥廸文經過巴黎、倫敦同丹吉爾，最後就返回紐約市，佢要千方百計解開自己嘅身世之謎，最重要係揪出自己被窮追猛殺嘅原因同幕後黑手。
作為《叛諜》系列完結篇，齋睇預告片已經知道今集嘅打鬥動作、跳樓、飛車同爆炸特技都比頭兩集更上一層樓，今次再由《叛諜追擊2：機密圈套》同憑《聯合93》（United93）獲提名奧斯卡最佳導演嘅保羅格連加斯（PaulGreengrass）執導，絕對係信心保證。佢仲同麥廸文及攝製隊到摩洛哥、西班牙、法國、英國同美國等多個地點取景。
影帝丹尼爾助陣
曾有消息指《哲古華拉少年日記》（MotorcycleDiaries）嘅墨西哥演員加艾爾加西亞般奴（GaelGarciaBernal）喺今集做奸角，暫時官方資料同劇照都未見佢出現喎，不過，德國名片《快樂的謊言》（GoodbyeLenin）嘅歐洲年輕影帝丹尼爾貝魯（DanielBruhl）就落實有份參演，都算係影迷嘅驚喜。
話你知：麥廸文呆望天國
《最後通牒》喺美國已經有四款海報曝光，一款好似頭兩集，影住揸槍嘅麥廸文喺街上非常迷惘，另一款係影住佢個大頭，感覺好滄桑，呢款仲𠝹開半邊大頭，拼埋麥廸文個挺胸收腹大隻半身look。不過最有趣都係影住麥廸文個背嗰款，張海報個構圖同感覺，真係令人聯想去年獲提名奧斯卡最佳外語片嘅巴勒斯坦電影《立見天國》（ParadiseNow），睇怕咁大嘅片無理由抄人啩！
娛樂資料庫：失憶積遜噩運纏身
《叛諜追擊3》下月上映，𠵱家就重溫吓頭兩集嘅劇情。第一集講述麥廸文喺大海漂浮多時，終獲一艘漁船救上岸，但佢失咗憶，背部有槍傷，更被植入一個內藏銀行戶口號碼的儀器，仲發現自己擁有非凡身手。為追查身世，麥廸文根據戶口號碼前往蘇黎世，並要對付要將自己置諸死地嘅殺手，原來佢係美國中情局訓練出嚟嘅殺手積遜。
第二集就講積遜終於喺印度搵到安全嘅棲身之所，不過零碎嘅回憶同夢魘依然纏繞住佢，神秘嘅敵人又再四面埋伏。由於女朋友瑪莉被殺，令積遜迫不得已重出江湖，與神秘兇徒展開連場間諜埋身戰。