泰國前總理他信回國無期，周遊列國無所事事做乜好？同好多香港人一樣，佢鍾意shopping，早前出手買起英超聯球隊曼城，近日佢又嚟到香港，噚日開記者會講吓呢個交易。他信話呢次嚟香港係參加一個高爾夫球會議，逗留三日就飛返倫敦。
親口否認買倚巒
他信耐不耐就喺香港出現，佢話好鍾意香港，仲即刻哼兩句"IloveHongKong"，又話最鍾意嚟香港購物。早前有傳聞指佢一擲億元買入山頂排屋倚巒一個冧巴，佢律師事後話冇咁嘅事，噚日佢親口澄清，話冇買到間屋，至於點解咁傳，佢就擰晒頭話唔知嘞。
他信鍾意買嘢，唔買山頂豪宅，咁喺香港睇中乜嘢呢？前日千人中環排隊買環保袋，唔知佢有冇興趣，至於佢喺香港有冇其他投資項目，或者傾緊乜大茶飯，佢一律三緘其口，政治更係絕口不談，記者會獨沽一味講波。泰國局勢平穩，他信可唔可以回國仲係未知之數，不過佢富可敵國，相信長期做寓公都好優游。雖然係落難政客，但佢排場都幾有睇頭，出出入入有四、五個保鑣、隨從跟實。