尹子維同周立璟經常帶女夜蒲，周末夜都唔例外，可惜原本一拖二嘅尹子維因為被記者撞破好事，搞到撇低女伴，而周立璟就因為冇女相伴而全程面黑黑，好鬼冇癮咁款。
噚日凌晨兩點半左右，尹子維同成班朋友喺中環Dragon-i蒲完出嚟，見佢同其中兩位打扮性感、胸前好偉大嘅女伴有講有笑，好有好感咁，其中一位靚女仲一路蹺住尹子維行去蘭桂坊方向，相當親熱。
周立璟形單隻影
不過，當記者上前影相嗰陣，原本蓮子蓉口面嘅尹子維即刻黑面，然後撇低兩個靚女，一支箭咁衝入夜店Volar，搞到兩位靚女同其他朋友都好愕然，成班人最後冇等埋尹子維，就繼續行去另一個地方happy。
至於周立璟前度女友AnaR.早排俾人影到同新歡放狗，但佢自己噚日凌晨時分就形單隻影咁蒲Dragon-i，離開嗰陣，周立璟仍然係一支公冇女陪，又難怪佢全程面燶燶，好似好冇癮咁款！
