黃家強是Beyond中年紀最小的成員，又是家中孻仔，從來都是被寵的一個，任性爛玩，天空海闊四圍去，但自從小B仔Keiyo出世後，家強即時轉性，日日望住時間做人，24小時oncall，慰妻湊仔一腳踢。
看着4個月大的Keiyo，從前面穿5環、攬結他做rock友的家強，驟變「餵奶．換片．湊仔公」，過程極論盡又搞笑，認真風水輪流轉。「我有同BB換片㗎，後來唔掂，太大『劈』，好核突，想嘔！」、「一放BB落床瞓覺就醒，即刻抱佢起身再𠱁過，來回幾次又係咁，點呀？」儘管湊B治家令家強頭都大，但回報是家庭幸福，頭再大，都值得啦！ 撰文：朱倬誼 攝影：陳慧安 場地：香辣屋
談湊仔
喜歡你，那雙眼動人，笑聲更迷人
講到湊仔，42歲的黃家強新手上場，雞手鴨腳，笑話特別多，但無論多論盡、幾麻煩都好，當看見4個月大的cutieB仔黃慶陽（Keiyo），一雙懂笑的眼睛在骨碌骨碌地轉，面上綻放天真無邪的可愛笑容時，BB仔屎尿屁，還有工作上的辛勞，家強都忘了。
追多個細佬妹
人生中有Keiyo和日籍太太Makiko共組美滿家庭，已令家強覺得幸福滿載。提起囝囝，家強真的很快樂，笑不停地說：「慶陽呢個名係老婆改嘅，日文名Keiyo，譯成中文係慶陽，即係高高興興、陽光啲。佢雙眼、塊面上半截似我，下半截似媽咪。佢幾易湊，成日笑、玩，唔算太黐身，唔使成日陪住佢。」
話說家強湊仔，餵奶、掃風、換片，兩父子有溫情有激情，叫人笑到碌地，他說：「我有同佢換片㗎，後來唔掂，太大『劈』，佢初頭飲人奶，唔臭㗎，一轉奶粉又臭又黑，好核突，想嘔！唔掂呀，交畀太太搞，但我有幫手餵奶；有時同BB掃風，又唔知掃到幾時，幾攰㗎，做湊仔公唔辛苦，太太辛苦啲，當BB瞓咗，佢會幾百無聊賴，又唔敢約朋友，會好困身，掃吓風又搞個幾鐘。」
晚上，才是家強父子大戰戲肉。「通常太太會瞓先，夜晚最後餵完奶、放低BB落床瞓覺嗰轉，我要處理得好好，放佢落床要好小心，唔係佢會即刻醒，又要即刻抱佢起身再𠱁佢，隻手好攰，但放完又醒，來回幾次又係咁，點呀？𠱁好耐都搞唔掂，會有啲𤷪𤺧囉，我同家姐講，佢仲話『好攰？遲啲你就知！』」但湊仔始終開心，家強意猶未盡，計劃為Keiyo增添弟妹。他說：「想追多個㗎，唔想個小朋友大咗咁孤獨，想佢哋年紀差唔多，可以一齊玩。」家強由rock友變成廿四孝老竇，兩年內拍拖、結婚、生仔，過程快過打針，莫說我們需要時間消化，連家強也要時間適應自己的突變。
幸福蓋過煩惱
「以前band仔唔定性，冇諗過將來，諗嘢好短線，工作上就一路擺時間喺音樂度，冇時間觀念，𠵱家諗得多啦，會諗屋企人，早啲返屋企，早啲收工，等太太安心啲，改變就好似速成班咁，乜都一齊嚟，以前諗嘢只係一個人，𠵱家一諗就3個，會牽涉太太同BB，突然咁快去適應呢樣嘢，都唔係一時間，但人大咗又幾enjoy呢個階段，畀到我幸福感，而且蓋過一切煩惱。太太唔喺香港時，屋企有好多問題要解決，忽然頭都大埋，但回報係幸福家庭，值得。」
講Beyond
迫不得已的話別沒說再見
上月30日，是Beyond主音黃家駒死忌，他沙啞滄桑的歌聲、激昂獨特的歌曲，至今令人難忘；而Beyond有前無後、打死罷就，為理想奮鬥的band仔精神，也一直在band界薪火相傳。雖然家駒已離開14年，但家強每次提起胞兄，依然感受很深，他說：「14年對我嚟講，係好長時間，心情係平復好多，但嗰種好掛住阿哥嘅心境冇變過，我會永遠記得。」
嘆沒可能復合
家駒、家強、黃貫中（Paul）和葉世榮於80年代組成的Beyond，曾帶領夾band潮流。這20多年來，他們又分又合，由家駒離世、到90年代三子的《二樓後座》、千禧年分道揚鑣、03年重組至前年拆夥，家強對每個階段都刻骨銘心。
「阿哥走咗嗰段時間，係最迷失、最辛苦、最傷心、最大壓力，我哋好畀心機做嘢，仍然係愁雲慘霧。有一段時間，我唔多唔少有模仿阿哥唱歌，其實係想保留，唔想Beyond消失一啲聲音，我唔覺得當時係愚蠢，只係自己嘅情意結。後來大家慢慢有番Beyond三個人嘅嘢出到嚟，到差唔多又散band，話就話分開先，但到第三個階段，重組仲難，因為大家有各自嘅音樂，好有主見，好激烈，好難再互相融合，所以05年拆夥。」
Beyond向被譽為「本地樂壇搖滾班霸」，至尊樂隊地位毋庸置疑，故當家強以「冇㗎啦」作為Beyond有否機會復合的答案時，確實很可惜，他也感慨說：「只可以無奈，大家分開咗一段時間，勉強再擺埋一齊，又係做番以前嘅嘢，我覺得有少少整衰Beyond個名，有負大家所託，不如等大家留番美好回憶啦。」
回家路𠱁老婆
沒有Beyond，獨立發展的家強，音樂路還是繼續，本月他將推出新碟，會首次寫歌獻給妻兒，他說：「一首係《哪吒回家》，廣東版係寫畀我嘅父母，國語版《哪吒離家》就寫畀BB，講會諗佢大個時係點，擔心佢將來又點；另外一首《回家的路》寫畀太太，係講有時自己做嘢好辛苦，當回家時，都希望有人等緊自己，代表我婚後嘅心態，以前就覺得返唔返屋企都係咁㗎啦，回家的路？去蒲的路就有。
「今次張碟放咗新靈感，樣樣嘢都有，有一首玩中樂㖭，叫《夢紅樓》，效果都幾好。我上次出碟係04年，都兩年幾冇理過樂壇，我覺得𠵱家嘅歌手進取咗，但樂壇就冇進步到，最hit嘅都係K歌大路嘢，我覺得方大同、周國賢都好有風格，係個好開始。」
《哪吒離家》
（送給BB的歌）
作曲、編曲、主唱：黃家強
填詞：周耀輝
越來越多戰火 越來越多工作
你呱呱墜下 能夠避開病毒
能否避開殘酷 你開始說話
為甚麼有戰火 為甚麼要工作
我不懂回答 只好勸你讀書
只好送你禮物 沒別的辦法
有一天你長大（像哪吒，要離家）
我有我的牽掛
（有冰山，有火山，在溶化）
有一天你出發
（有垃圾，有權力，在腐化）
你有你的天下（不要比我的更差）
祝你快樂 可自己快樂嗎
無憂無慮 可世界太複雜
祝你好運 可自己相信嗎
天大地大 你最好長不大
誰和誰在出生 誰和誰在鬥爭
你漸漸長大
動物沒有保護 人類不會滿足
你開始驚訝
為甚麼要出生 為甚麼有鬥爭
我不懂回答
不用大貴大富 只要你走你路
就當做報答
有一天你長大（像哪吒，要離家）
我有我的牽掛
（有冰山，有火山，在溶化）
有一天你出發
（有垃圾，有權力，在腐化）
你有你的天下（不要比我的更差）
祝你快樂 可自己快樂嗎
無憂無慮 可世界太複雜
祝你好運 可自己相信嗎
天大地大 你最好長不大
祝你快樂 可自己快樂嗎
無憂無慮 可世界太複雜
好的留下 不好的帶走它
不怕不怕 你快高你長大
