一個賣120蚊嘅英國名牌AnyaHindmarch環保袋，搞到全世界為袋爭崩頭，講到尾一係虛榮感一係為搵銀，有冇人係見到佢句"I'mNOTAPlasticBag"引發環保小宇宙而通宵排隊通街瞓？算罷啦！斷估唔會有人拎佢去袋嚿豬肉加條魚啩。講到真正環保袋，就應該好似以下名人咁，抱住「舊袋勝新袋，冇袋好過有袋」嘅原則，咁就真正夠環保嘞！
余若薇靚袋循環用
大把名牌手袋嘅立法會議員余若薇，前日返中環office都俾置地AH門口人龍嚇親，佢話若果香港人支持環保都咁熱心，重見藍天指日可待。Audrey對呢個120蚊嘅袋sayno，皆因佢已經有一個超市帆布袋傍身，幾蚊雞貨色，拎去買餸啱晒，加上有排都未爛未殘，使乜嘥錢再買？至於佢嘅靚手袋雖然貴啲，但用到殘都唔丟，有時會轉贈親友循環再用，慳家又環保。
天星女鬥士何來見到咁多人「發袋瘟」就火滾，佢同八方講「唔消費先叫環保」，瘋狂搶購環保袋唔係為環保，只係為咗滿足購物慾啫；而且環保唔應該製造混亂，AH應該好好檢討吓，否則賣個環保袋就剩底成街垃圾，咁都算環保？人人認為唔用膠袋先叫環保，何來個「環保袋」竟然係超市膠袋，「唔係新簇簇嗰啲，喺垃圾桶執番嚟用，就算穿少少窿都照用，我有時仲會執紙箱當買餸籃。」
何來將膠袋循環再用冇嘥嘢，綠色學生聯會主席何漢威就堅持「無膠勝有膠」，盡可能唔用膠袋，孭大背囊逍遙自在。環保中堅分子陸恭蕙都叫八方咪買袋，「人人屋企都有大把袋，乜唔夠用咩？」佢話環保袋唔使畀錢買，皆因參加環保活動時，耐唔耐都收到啲「正宗環保袋」。
綠色和平袋夠矜貴
綠色和平項目主任張韻琪都撐「免費袋」，佢嘅背囊就係抽獎禮物，用咗三年依然新淨，唔會輕易將個袋當垃圾。綠色和平都有出環保袋，款式簡單，係非賣品，要捐錢做會員先有㗎。搶唔到AnyaHindmarch袋嘅買家，不如諗諗佢啦。
