八方寫稿生產文字好似「車衣女工」，過氣政客寫稿，車嗰件衫隨時係「金縷衣」。前新華社香港分社社長許家屯接受有線新聞訪問，反駁對頭人指佢貪污腐化言論。佢話當年袋住一萬蚊就出走美國，初時食住靠星雲大師，之後賣文為生賺埋唔少，自爆《信報》搵佢寫文，一篇稿二萬蚊美金（約15.6萬港元）。
久唔久寫篇稿對老許嚟講，應該屬於搵外快濕碎錢，出回憶錄先係搵真銀，收幾十萬美金，𠵱家住緊間屋都係咁賺返嚟，外傳好多富豪幫過佢，佢話適當時候先公開。幾時適當，八方相信可能要睇吓戶口先知。老許又話，相信鄧小平89年冇下令開槍。呢個疑團，搵邊個問小平同志好呢？