劉德華最近找來城市當代舞蹈團導師梅卓燕為其新歌MV排舞，他與靚女舞蹈員Sindy狂跳貼身舞，由舞會跳到返家，又由梳化跳到上床。華仔為求好效果跳到不願停，被Sindy指他不是人，像充足電力的機械公仔。
劉德華日前為國語新歌《一》拍MV，請來城市當代舞蹈團導師梅卓燕為他排舞，但僅排練半天便要拍攝，華仔跳足7個鐘後，獲老師大讚跳得好，但他累得只能喘着氣點頭以示感謝。
今次MV內容講述華仔在舞會中遇上心儀對象，二人跳舞跳到回家，只見飾演該靚女的舞蹈員Sindy圍着梳化轉圈跳不停，又由梳化跳上床，與華仔面貼面、身貼身的相當親密，還不時做出高難度動作，華仔則盡力配合，而且每個鏡頭都要跳到完美才肯停。
似叉電公仔
Sindy說：「難怪出面傳話劉德華唔係人，我職業跳舞都跳到又攰又餓，佢就成個叉滿電嘅機械公仔咁，從來唔叫停，只係聽到佢係咁話『再嚟再嚟再嚟一次』，真係厲害。」
Sindy又大讚華仔為人細心，關心她有沒有做好防走光措施，見她衣服不整齊又主動為她拉好，感覺親切。華仔笑稱現場有很多工作人員，不想Sindy走光蝕底。
頻轉圈頭暈
問華仔不停跳舞累不累，他說：「拍嘅時候唔攰，拍完返到屋企就攰到講唔到嘢，即刻要瞓。其實最辛苦係不停圍住梳化轉圈，跟住抱起女仔嘅動作，因為要一氣呵成，每次跳完我都天旋地轉，頭暈暈，有一次我仲拉唔住佢，搞到佢成個人跌落梳化，笑到我哋跳唔到呀。」得悉被Sindy笑指「不是人」，華仔笑說：「係咩？因為得半日排練，我啲舞步唔夠熟，又唔想跳得差影響佢同影響梅老師嘅大名，咪一定要跳到好為止囉。」
撰文：丁寧
