《Shrek3》徹頭徹尾就像是一齣港產片，如果閣下看的是廣東話配音版本，那根本就是一齣港產片。我看的是英語版本，字幕企圖翻譯得很本地化，起碼出現了兩次「呀媽都唔認得」，這句說話懷舊味十足，Out到唔恨，今時今日都少聽到仲有人講，唔知配音版本中有冇人講過，有就該煨。
強調港產片一詞並無貶意，港產片出晒名娛樂性豐富，尤其係節奏方面，爽朗明快，用嚟驅寂寞、殺時間一流，就以港產《無間道》與荷李活產《無間道風雲》做例子，不少觀眾較喜歡港產《無間道》，只因節奏較快，娛樂性較豐富，但若喜歡嗒戲嘅觀眾就一定鍾情後者，皆因人物刻劃細膩有戲味，有排嗒。
《Shrek3》的主創人員大概都是史提芬周的影迷吧，起碼聯合導演許誠毅先生應該係，片中的密集笑料充滿了無聊色彩，強調無聊並無貶意，無聊是笑料的根源，極其認真地幹無聊的事最好笑，《Shrek3》極其無聊，所以好好笑。
荷李活着實功夫熱了好一陣，蝙蝠俠識得用拈花擒拿扭亁衫，星球大戰中用激光劍以搏命單刀奪命槍式動作打Ending，連奇洛李維斯都識蔡李佛，港產功夫片已經被參考到冇乜好參考，鏡頭一轉，轉而參考港式密集笑料，港產動作指導被荷李活重金禮聘搵美金，唔知幾時輪到港產喜劇編劇被睇中，如果有咁嘅一日，希望唔該預埋我。