開飯喇！OpenRice，係好多香港人嘅搵食指南網頁，當中更有「最多投訴的餐廳排名」。究竟呢啲資料可信性有幾高呢？有冇俾人屈呢？我哋為此去咗首10間最惡評餐廳扮客人測試，又問吓其他現場食客，仲畀食店自己開聲辯護，實行畀佢哋一個機會嚟個大平反！
記者：趙佩倩、馮冠芝
攝影：陳陶鈞、譚盈傑、梁細權、林栢鈞、伍慶泉、陳盛臣
1.大久保（油麻地）幾十蚊任食OK
食評指控：落咗單20分鐘都冇嘢食，叫10樣只嚟2樣，貴嘢永世唔嚟、服務差劣、壽司飯一夾即散、魚生有雪、牛肉味怪。
放蛇直擊：1/7午市幫襯，搭枱坐但侍應斟茶遞水，態度唔差。點咗10樣嘢，10分鐘嚟7樣，單冇亂。三文魚壽司成個夾得起，冇咩魚味，但未至於有雪！肥牛野菌高野煮，亦冇怪味！
食店回應：經理陳先生承認，繁忙時段難免忙中有錯：「落單紙要客人自己寫枱號，有時佢哋唔記得寫，或者我哋送錯，但已經盡量改善。至於食物，旺的時候，魚生內裏可能未解凍，客人唔滿意，我哋一定換過碟。」
「蘋」審員：食物味道不過不失，幾十蚊任點任食，算係咁啦！服務冇問題，經理亦接受意見樂於改善，平反成功！
食客Maggie：「叫嘅食物到齊，服務都OK！」
查詢：27713138
2.加太賀（紅磡）魚生保水準
食評指控：花之戀愛壽司冇以前咁靚咁好食、魚生淡如清水、金菇牛肉卷有異味！服務態度麻麻，全部大嬸，餐廳污糟擠迫。
放蛇直擊：5/7正午去，可能剛開市，地板拖完有水迹。侍應果然全是中年婦，但無損服務態度，添茶勤快。花之戀愛壽司都幾靚。叫午市定食，加$8換三文魚刺身，都OK，有魚味有光澤！金菇牛肉卷有燒汁香烤味，肉質有少少老，但冇異味，仲有雪糕芒果糯米糍送㖭！
食店回應：經理許先生：「10年來我哋沒有換過魚生供應商，一直保持水準。針對座位擠迫的問題，我們增設了VIP房、獨立房間，供客人選擇。」
「蘋」審員：無論食物服務都有紋有路，平反成功！
食客阿藍：「花之戀愛壽司幾大嚿幾好食，服務幾好！」
查詢：27646436
3.Amaroni'sLittleItaly（九龍塘）
雞肉嫩滑味濃
食評指控：露絲瑪麗雞又嚡又有雪味、餐前麵包凍冰冰，加黑醋勁怪、接待只黑衫黑口黑臉、環境太吵太迫。
放蛇直擊：6/7下午2時入場，人客唔多，接待姐姐笑容滿面。選了露絲瑪麗雞Panini，雞肉醃過味濃，口感嫩滑！餐前包的確唔熱，但非常軟熟，至於點黑醋，個人覺得幾得意。
食店回應：經理AndyLam：「香港寸金尺土，環境迫都難免！至於露絲瑪麗雞，我哋亦會收集顧客意見，得到的回應也是好多於壞。不過亦感謝大家的意見。」
「蘋」審員：份量多亦好食，餐廳和諧舒適，刻意營造聚餐的氣氛，座位近一點，多一點人情味嘛。平反成功！
查詢：22658818
4.佳記甜品（元朗）
食評指控：用罐頭水果、燉蛋唔新鮮、店員態度差劣、枱面唔亁淨、店舖旁有條大坑渠，令人唔開胃！
放蛇直擊：4/7下午5點，烈日當空，大坑渠不時飄來臭味，但唔算太勁。全店爆滿，店員確實要叫幾次。枱執完好亁淨。涼粉中的水果，新鮮及罐頭貨各半。燉蛋唔太滑，但有蛋香。
食店回應：老闆娘馮太：「整B仔涼粉時新鮮水果及罐頭水果比例為1比1，因為水果供應係季節性嘅，何況有時用罐頭水果，配合得宜，會更好味！燉蛋則是即日清，賣剩唔留過夜！」提及大坑渠有臭味，馮太亦好無奈。
「蘋」審員：B仔涼粉抵食，至於環境，罪不在佳記。店員雖要叫幾次，但唔算差，平反成功！
查詢：24733148
■食客楊先生：「唔覺有臭味，不過B仔涼粉罐頭水果幾多。」
查詢：24733148
5.九記牛腩（上環）腩爽略油
食評指控：清湯腩嚡到似湯渣、湯底太油太鹹、咖喱牛腩河有筋冇腩、油菜又老又黃、份量少、服務差。
放蛇直擊：4/71點正試食，牛腩爽得嚟唔黐牙，食完碗底有層油，但幾好食。咖喱牛腩河就半筋半腩，鹹咗啲。油菜嫩綠爽脆。店員姨姨落單唔使抄，見到記者眼神迷惘，更會問：「冇爭你嘢嘛？」
（食店未作回覆）
「蘋」審員：食物OK，店員唔係懶理生客，只係粗聲粗氣，平反成功！
食客李先生：「我哋成家係呢度熟客，食咗十幾年，好好味！」
查詢：28150123
6.糖朝（尖沙嘴）叉燒腸足料
食評指控：杏仁糊加湯圓激難食、湯圓皮硬心凍、叉燒爛碎、新開壺茶涼浸浸、店員態度差冇禮貌、逼人搭枱、上菜阿姐黑口黑面。
放蛇直擊：4/7下午5時到該店，差不多8成滿座，要求坐卡位，店員隨即安排。甫坐下，即奉上熱茶一壺，仲斟埋。叫咗杏仁糊加湯圓、叉燒腸粉，叉燒雖細碎，但落足料，味道不差。杏仁糊等了15分鐘，店員禮貌地解釋，吃來有生磨杏仁味，湯圓皮厚咗啲但軟腍，咬下有芝麻餡流出。服務唔算差，沒遇上黑面上菜阿姐。
食店回應：副經理呂小姐：「我哋都有睇OpenRice，不論正面或負面我哋都會跟進。」
「蘋」審員：食物唔難食，服務不俗，加上管理層有心做好，平反成功！
食客莫小姐：「地方闊落舒適，食物同服務都OK吖﹗」
查詢：21997799
7.巴西燒烤（尖沙嘴）勤添新嘢
食評指控：燒烤種類少又等得耐、牛排燒到燶、甜品得幾款、服務差。
放蛇直擊：4/7消夜時段，坐低10分鐘即有店員捧出食物，每隔5分鐘添新嘢。水準一般，部份肉類偏鹹，牛排和燒排骨太亁；甜品有過10款。（食店未作回覆）
「蘋」審員：以$58任食水準合理，平反成功﹗
食客蕭小姐：「食物OK，勝在選擇夠多又夠平！」
查詢：27214689
8.勝利小廚（何文田）好味份量少
食評指控：服務員對食客呼喝、態度極之惡劣、海南雞飯的雞嚡過鞋底。
放蛇直擊：記者於2/7中午幫襯，喺門口等咗10分鐘都未入得，走入店問又俾店員毫不客氣地「請」番出去等。過多一陣終於有位，嗌招牌菜海南雞飯，雞肉唔算嚡，只是略嫌油飯唔夠香。（食店未作回覆）
「蘋」審員：海南雞飯平反成功！但招呼認真麻麻，有待改善，平反唔到。
食客羅生：「海南雞飯幾好，但份量少啲，店員係粗魯啲，但會再嚟﹗」
查詢：27600033
9.澳洲牛奶公司（佐敦）極速招呼
食評指控：叉燒薄而無味、湯底又鹹、價錢貴、侍應態度古怪冇禮貌。
放蛇直擊：記者於2/7黃昏到食店，全店坐滿，但等幾分鐘就有位，茶餐1分鐘唔使極速上枱。叉燒係薄啲，但都有肉味，湯底唔算鹹；店內10幾個侍應，一叫即應，態度唔算差，仲同我講笑。
食店回應：負責人拒絕就投訴事件評論。
「蘋」審員：價錢貴唔貴就見仁見智，但食物與服務態度都可以接受，勉強平反成功！
食客Judy：「成日嚟食，炒蛋好食，價錢合理唔算貴，服務態度都OK！」
查詢：27301356
10.FatAngelo's（尖沙嘴）侍應細心
食評指控：雞肉超嚡韌、三文魚闊麵鹹到死、侍應叫極唔應、冇禮貌、斟水斟到瀉。
放蛇直擊：於3/7中午到食店，食客不算多，揀角落卡位坐，侍應見我坐下即着外套，就問需唔需要調細冷氣，夠細心。試了雞胸同三文魚闊麵，真係唔覺得食物有問題，雞肉仲幾好味。舉手叫侍應斟水，即應，亦冇斟瀉。
食店回應：董事總經理AndyChworowsky：「有投訴先有進步，最重要係要當錯失出現時要立即處理解決。如果係投訴侍應做得唔好、食物質素差，我哋會跟進改善，如對任何食物唔滿意，亦可原銀奉還。」
「蘋」審員：食物同服務質素皆屬中上，老闆又重視客人的意見，願意接受批評，當然平反成功啦！
（左）遊客Andy：「食物好味，環境唔錯，卡位好舒服，好Relax。」Nicky：「服務好好，侍應都好有禮貌！」
查詢：27304788
