斷正如何自救：
★處之泰然 任影唔嬲
★扮醉行兇 飛擒大咬
幾乎係所有男人心底噩夢、潛意識驚魂，前晚終於喺廣播處處長朱培慶身上發生，佢同艷女郎夜遊時俾記者撞到正影埋相，真係水洗唔清一身蟻。好多人陰謀論指今次係煲呔政府放料玩殘港台，尤其係政圈中人，甚至有高官都講笑話特首府心戰室又立一功，一招就打窒撐港台班人。
不過八方話畀大家知唔係，事緣當晚成班娛記喺銅鑼灣採訪阿B鍾鎮濤個miniconcert，朱處長同女伴經過，娛記眼利認出佢，一擁而上影相，啱啱遇着剛剛，就係咁出事。大家覺得係政府所為，都怪煲呔愛搞小動作形象太深入民心，如果有人食住上，八方亦唔會意外。
噚日好多人同八方講，俾人見到「蹺女」使乜驚喎，應該大大方方企定任影，須知道好多男人講就天下無敵，做就有心無力，真係斷正時可能仲樣衰。有啲事寧俾人知莫俾人見，所以好多人習慣單嫖獨賭，不過公眾人物見光死，一旦夜遊時出事點樣應變呢？八方搵專家即食炮製求生手冊，男女合用。
陶傑：掩面都唔係辦法
見盡紅男綠女嘅才子陶傑話，夜遊時都要記住香港係國際大都會，男女喺公眾地方莫講話蹺手，擁抱甚至kiss都好平常，俾人踢爆應該處之泰然，等記者影到夠，因為私生活同工作能力冇關，亦唔需要向公眾交代，好似朱培慶左閃右避就𤓓到爆喎，搵手掩面或者包住個頭都唔係辦法，「咁樣匿法，冇嘢都俾人講到有嘢啦！」陶傑曾被雜誌指佢同女伴出入九龍塘某別墅，行迹敗露後更用廁紙包頭走人，佢同八方講呢啲嘢係「揑造」喎。
唔係人人好似陶傑咁見慣大場面臨危不亂噃，有蒲精話斷正時應該借醉行兇，最好攬實女伴或男伴狂嘴，舉止有咁誇張得咁誇張，有咁浮誇得咁浮誇，大家見到咁嘅場面，以為你玩嘢多過尋歡啦，順手call埋死黨接自己走，之後可以話酒後失儀，避重就輕咪乘機甩身囉。
港台人：少去老銅為妙
專業註冊臨床心理學家羅志華話，朱培慶當時表現失措匿喺女伴身後，可能係擔心公眾形象受損，「突然間有人侵入咗佢私人空間，佢唔知點算，咪有啲咁驚惶囉。」羅志華話呢啲心理障礙好難克服，不過相信朱培慶下次唔會咁狼狽。呢啲嘢衰一次都夠啦，怕且唔會有第二次啩。好多港台中人對處長呢單嘢無話可說，有人講笑話近排都係唔好蒲老銅為妙，費事俾記者影到，捕風捉影無端端見報。