今日係七月七日，係盧溝橋事變七十周年，應該好多人記得啩？一定記得嘅係前行政長官董先生，佢生於一九三七年七月七日，今年七十歲，步入古稀之年，恭喜晒。
人生七十古來稀，呢句說話今日不再有用。聯合國資料話香港男人平均壽命係七十九至八十歲，全世界最長命；香港女士近八十五歲，僅次於日本女士。香港人煙稠密，空氣污染，噪音吵耳，更且生活緊張，節奏太快，何解男士女士比地中海地區啲悠閒人士更長命，實在奇怪，睇嚟應該歸功於香港醫療水平好，嬰兒夭折率極低之故，香港人能兼享西醫診病、中醫補身之便，費用唔高，係香港人之福氣。
呢日碰到商界女強人C，佢話保持健康要有運動，飲食均衡，兼且每年驗身，病向淺中醫係最啱嘅道理。女強人C話：「不妨到會長C與議員C嘅醫院驗身，驗完喺曼谷輕鬆吓，更加健康。」議員C家族擁有嘅醫院，每年有十萬人去驗身，可能係亞洲最繁忙嘅私家醫院。記得喺港交所七周年酒會碰到Q網站老闆鬼佬B，佢就講過佢哋公司高層每年到議員C間醫院驗身。驗乜好呢？女強人C比較嚴肅咁話：「近年在香港不斷上升嘅病症係乳癌、前列腺癌與直腸癌，反而其他癌症有減少趨勢或者增加得慢。上天幾公道，剛好一種係女人病，一種係男人病，一種係男女都會染上嘅病！」
何以呢三種癌症嘅數字，不斷上升，大概冇人知道答案，亦防不勝防，唯有定期檢查身體，希望冇事。過得未來十年，相信啲生物科技專家與製藥專家會諗到更好嘅治療方法喎，到時人類壽命會更長，人類擔心嘅問題變成唔係醫藥，而係有幾多退休金生活兼養命！
順此一提，一位中七科技尖子話第一志願係讀中大藥劑學系，想他日能夠創出更環保嘅製藥方法喎。尖子嘅志向可嘉，不過據教授W說，想他日識得製藥，要讀嘅係化學系，唔係藥劑學！