最近喺衣櫃底搵番條一直着唔落嘅褲，今日一試，居然鬆咗2吋！咁當然啦，天氣酷熱，搞到個人冇晒胃口，飯都食唔落，瘦就瘦嘞，但唔健康呢！好彩及時發現有酒店推出新鮮水果中菜，更採用平時較少入饌的水果，好似蓮霧、蜜瓜等，開胃又醒神，五顏六色好吸引，咁樣勁擦都唔怕肥啦！
記者：馮冠芝
攝影：林栢鈞
Model：ElaineTsang
鳳梨囗枝少食多滋味
既然今次係中式水果菜，咁就不如以中醫角度，睇吓水果菜中的主角──水果對人體有何好處！
蓮霧：蓮霧具解熱、利尿、寧神作用，清涼解渴；無論口感、味道、營養都與蘋果相似，而熱量比蘋果低。
鳳梨：有人話佢濕熱，多吃會引致肚瀉，但其實它含豐富纖維，有利便作用。《本草綱目》的李時珍更認為，呢種水果「健脾胃、固元氣」。
蘋果：蘋果被美國《讀者文摘》選為10大健康水果的第1位，能治下痢、滋潤皮膚、清潔牙齒。是瘦弱而食慾不振者補充體力的好選擇。
荔枝：一粒荔枝三把火，不宜食太多，所以用來做水果菜，食少少就啱嘞。對補血、健肺、促進血液循環都好有功效。
蜜瓜：《本草綱目》話，蜜瓜止渴、除煩熱、利小便。
水果佔6成夠健康
水果菜其實唔算罕見，好似菠蘿咕嚕肉、檸檬雞翼等我哋都經常食。但有26年入廚經驗的帝苑軒主廚黃文杰師傅，化平凡為創新，他精心挑選入饌的水果時，都會考慮到食材比例、口感、味道、賣相等，「我們堅持水果同肉嘅比例為6比4，這樣更加健康。」
蓮霧炒蝦球 $148
煮水果菜，通常都會用菠蘿、芒果一類較易控制火候的水果；但今次師傅大膽選用蓮霧，其爽脆的口感與大蝦相得益彰，切成薄片的蓮霧清甜得嚟又能帶出蝦的鮮味，大蝦亦滲了淡淡蓮霧清香，蝦中有蓮霧，蓮霧中有甜蝦，蝦球爽到彈牙，口感清甜，消暑之至！
百花糯米糍 $128
將蝦膠釀入圓大香甜的荔枝，再撒上蟹子，一咬落去，荔枝汁咇晒落蝦膠度，荔枝腍，蝦膠蟹子爽，再加埋小棠菜好似湯匙咁兜住粒糯米糍，食落又清又甜又爽，胃口返晒黎。
蘋果話梅雞煲 $98
最受女客人喜愛的水果菜！雞肉選用去皮鮮雞髀，滑得嚟唔肥，以微酸的話梅汁及蘋果入味，開胃之餘，師傅更以薑片撞上酸話梅汁，令雞煲添上微辣，味道豐富有趣。
鳳梨啤梨炒桂魚球 $98
鳳梨由菲律賓新鮮運到，甜得嚟唔嚡口；啤梨爽脆清甜；桂花魚球吸晒兩種果味之餘，其肉質爽實，與「雙梨」襯到絕！
金華火腿龍眼浸娃娃菜$108
金華火腿雖然香，但略嫌太鹹，今次以娃娃菜吸味中和，更配上話梅汁、龍眼，正是菜清、果香、火腿濃，3種味道配合得剛剛好。
脆皮蜜瓜和牛$398
炸鮮奶就聽得多，炸蜜瓜有冇試過？薄薄的脆皮包裹着蜜瓜，外面香脆，裏面的蜜瓜鮮甜多汁。蜜瓜炒和牛，牛肉味濃腍滑，吃時舌尖嘗到清甜的蜜瓜味，惹味可口。
食店資料
帝苑軒（27242666）
地址：尖沙嘴麼地道69號帝苑酒店地庫2樓
營業時間：
11:30a.m.-3:00p.m.
6:00p.m.-11:00p.m.
座位：188個
交通：尖東火車站P2出口
