潮州硬漢詹培忠最近患上鼻咽癌，好彩詹叔發現得早，及早做化療同電療，今個月中就完成療程，暑假可以休養，10月應該可以重返立法會開工。詹叔同八方講，近月由160磅減到148磅，一次過減咗12磅，超額完成減肥目標。
要捱多8次電療
詹叔今年2月初去醫院體檢，3月底醫生發現佢有腫瘤，4月10日證實係惡性，由於估計可能都係飲太多酒累事，所以即時戒酒，隨即排期做化療、電療，至今做咗40幾次，仲要捱多8次電療。詹叔話今次執番條命，但口腔同身體各部份摧殘好大，𠵱家個口仲好痛，不過佢好似睇化咗，話呢啲都係人生必經之路，惟有死忍。
另一患癌議員民建聯主席馬力同好多癌症病人一樣，中西合璧抗癌，詹叔卻信西醫多啲。佢話做手術、電療、電療加化療同中醫都有人介紹，總之乜嘢神醫秘方偏方都有人提議佢試，不過佢認為中醫唔可以徹底根治病源，所以都係搵西醫。
詹叔話近月請咗四次假冇開立法會大會，不過養病期間都有處理議員事務。佢冇講出年會唔會競選連任，只係話醫生指若五年內唔復發，就算係大步檻過，仲有排玩。