移民紐約好多年嘅賓架K回港探母，星期四來電約飲茶。賓架K以前在大通銀行與馬局長係同事，後來去咗美華，然後去漢華。點知美華收購咗漢華，跟住大通又收購美華，於是又試為大通打工。退休後賓架K喺紐約被亞洲資本銀行延聘為合規分析員，有排做。美國啲監管法律製造大量就業，好似合規師呢類工種，以前聽都未聽過。
以前賓架K在置地廣場返工，於是相約在七月六日下午喺噴水池見。點知七月五日夜晚已見有人喺HarveyNichols門外排隊，七月六日早上，人龍包圍置地廣場，左丁山矇查查唔知發生乜嘢事，走入中建大廈去置地廣場，點知入口封咗，走去畢打街LV旁邊入，又封咗；走去地鐵站入口轉過去置地廣場，保安員門前擋駕，唔少人與保安員理論，卒之要返上德輔道中Tiffany旁邊入口。行到身水身汗，為之把幾火。
賓架K企喺噴水池旁，亦唔知發生乜事，左丁山捉住一位實Q問，先知道大量群眾（以女士為主）包圍置地廣場，輪購一隻甚麼Anya（姑譯之為哎吔）環保袋。賓架K與左丁山為之莫名其妙，環保袋點解值得咁多人爭購？賓架K係老一派，不知「哎吔」為何物，大家無從討論，飲茶傾吓近況更好。
飲完茶見到靚女V，屬於潮人一類。問佢識唔識「哎吔」，靚女V話：「『哎吔』乜呀，AnyaHindmarch呀，我已經訂咗兩個環保袋啦。仲未攞啫！」人哋排晒長龍，靚女V竟然有得訂？靚女V補充：「我係Anya嘅VIP客戶，有VIP卡就可以預訂兩個。」左丁山笑曰：「𠵱家咁多人排隊，你可以炒一轉噃？」靚女V講：「拎去米蘭站，價錢升十倍，如果𠵱家喺大道中叫賣，畀人踩死都似！」
一個購物袋，看似平平無奇，居然有咁多人爭住搶，左丁山諗極都唔明，大概係名牌心理作怪，睇見啲明星揸住，普通人又話要。品牌價值好神秘，做個同樣嘅環保袋，印上一個蘋果，你估有冇人要呢？