小時候我們愛與爸爸玩騎膊馬，吳夏萍一對寶貝女，大女賴楨敏和幼女賴倩敏騎的卻是真馬。兩個女兒八、九歲時便躍上馬背學跨欄，戰績彪炳，而吳夏萍教女之道也像策騎一樣張弛有道。大女欲離家出走，吳夏萍寫信苦勸；孻女沉溺ICQ，凌晨三時她將其床鋪扔出屋外。這個「愛馬士」家庭，在馬背上見證親情無價。 撰文：吳慧思
港姐出身的吳夏萍，曾參演《歡樂今宵》，又試過出碟做歌星。90年與男友賴焯藩結婚，其後誕下兩女楨敏（Jacqueline）和倩敏（Jasmine），五年後離異，吳夏萍母兼父職照顧兩個寶貝女。
學習分配時間
當年吳夏萍為了產後收身而習騎，卻觸動了囡囡的愛馬細胞，兩個女兒八、九歲已主動要求學騎馬，更放棄了最愛的游泳，每天到上水雙魚河騎術學校練習。吳夏萍說：「我好民主，我畀佢哋自己揀，等佢哋學識點樣安排時間同資源。」兩匹歐洲馬，Drumlough由楨敏策騎，Gamo則由倩敏照顧，兩姊妹征戰無數，成績叮噹馬頭。早前她們出戰大馬參加東南亞少年組別跨欄大賽，妹妹贏得總冠軍，險勝胞姊一個馬鼻。
女兒練習期間，吳夏萍全程在旁侍候，她笑道：「我係超級阿四，負責遞毛巾遞飲品拖隻馬出去。其實我好怕熱，搞到成日俾人話我做乜又亁又瘦又『柴皮』。」
楨敏與倩敏相差一歲，性格迥異，16歲的大女比賽時多靠臨場執生，細女則會作完整部署，吳夏萍說：「細女決斷力強過家姐，大女仲未可以好清晰咁揸定主意，競賽決心唔夠。」
今年初，大女寫信給吳夏萍，表示想跟爸爸同住一段時間，吳夏萍回信勸她三思，她說：「我話爸爸同你嘅生活模式唔同，你咁樣做就係影響其他人。後尾個女回番封信畀我，話下次先啦！」至於幼女倩敏，吳夏萍說：「佢成日玩ICQ、MSN，唔肯瞓，我之前畀咗佢好多次警告，佢都唔聽，到凌晨三點我就將佢所有被鋪床褥掟出屋外嘅走廊，鎖埋房門，之後細女死死地氣拉番啲被鋪入屋，瞓咗一晚廳。」
錯誤中求進步
大女曾埋怨母親太嚴厲，吳夏萍表示只想女兒每次比賽能盡全力：「名次唔緊要，我只希望佢哋進步。我想佢哋學習點樣處理環境，同埋挫折之後嘅心情。」談到期望，她笑說：「希望大女更加決斷，細女就瞓多啲啦！」
學費七萬 棄買名牌
馬術分三種，分別是步操、跨欄和盛裝舞步。吳夏萍為了讓女兒接受重點訓練，故選擇專攻跨欄一項，每月單是學費和養馬費用已高達68,000元。
灌輸正確價值觀
港姐出身的吳夏萍，與丈夫賴焯藩離異後，獨力照顧兩女。她省掉買名牌的錢給兩女學馬術，又給她們灌輸正確價值觀，她說：「我同佢哋講，以前我做藝人嗰陣一對鞋要成2千幾3千蚊，但一對鞋只襯到一件衫，𠵱家用2千蚊都夠你哋上四堂啦！」
談到從前的演藝生涯，吳夏萍表示已甚少向兩個女兒提及，她笑謂：「係都諗吓聽日出賽行程點樣安排啦！」
攝影：陳俊強
場地提供：上水雙魚河騎術學校
