教不嚴師非惰 - 左丁山

教不嚴師非惰 - 左丁山

設計名師L不時到台北觀賞故宮展品,當係補充營養。問佢多唔多去北京,佢話:「如果單係為咗睇古代珍貴文物,到台北係首選,北京故宮博物院嘅珍藏,以數量及藝術價值計,比台北遜色。」佢話有一次到澳門參觀包裝藝術展覽,見到唔少珍品,來自北京。呢啲甚有價值嘅包裝盒,以前係用來裝載古代文物嘅,但盒內嘅珍品在抗戰時期全部裝箱運去重慶,避免落入日本人之手。於是物去盒空,啲盒後來留在北京,好多完整無缺,盒內寶物就收藏於台北故宮博物館,故此台北好多國寶。
在香港藝術館碰見名師L之前,遇上書店總裁C博士,當然要恭喜佢獲得科技大學頒發榮譽院士銜,總裁C甚為謙虛,猛話唔敢當,其實佢當之無愧,在佢管理下,佢間書店出版大量有價值書籍,推動文化產業,有益社會。最近總裁C嘅大學師兄,大學出版社社長L自大學榮休,重投總裁C書店旗下,相信係發展國際業務。社長L有哈佛博士銜頭,行去邊度都令對方尊敬,歐美出版界邊度敢睇小一位哈佛博士吖,名牌大學嘅學位,係零舍馨香啲嘅。
社長L讀歷史出身,但大學一年班時讀英文系,上美國文學堂,美籍講師T來自耶魯,年少氣盛,要求甚嚴。社長L講過,有一次全班學生(只有十二人)開讀書會,研讀海明威,開會後各自寫讀書報告,內容自然大同小異。講師T睇完之後,上堂怒擲報告,大罵佢哋,「Youallcheated。」嚇到佢哋以後各自讀書,唔敢再開會商量本書講乜。社長L話:「後來我哋明白到,分析作品要有自己觀點,不能人云亦云,經常開會,容易抄襲同學意見與觀點,大家趨向平均化,完全冇新意,失去創意!」社長L呢個故事畀現任大學教授L聽到,另有一番意見:「𠵱家教書唔可以學講師T咁認真,否則學生會畀你好低評分(rating),自己有排煩,我哋要對學生好客氣㗎。」對教授評分,乃美國玩意,凡係美國方法來到香港,就有啲變質,好事往往變成缺點。為何如此,唔知有冇人研究過!