90年代港產片《賭俠》入面，星仔有副好有眼力嘅「天眼通」同催眠神功；而英超隊曼城嘅未來領隊艾歷臣同孫繼海（老孫），亦分別練到呢兩種神功，實行來一場特異功能大激鬥，咁究竟最後邊個犀利啲呢？
事緣，艾歷臣日前用「天眼通」睇完曼城操練後，即刻同球會高層開會，話除咗隊長李察鄧尼外，其他球員好唔掂；仲講明要買前鋒、中場、翼鋒各兩件，門將1件、後衞3件，睇嚟大換血係勢在必行喇！而備戰緊亞洲盃嘅老孫，又會唔會逃過今次大難呢？
曼城大清洗老孫有份
雖然老孫喺嗰課曼城操練因為身在亞洲，所以好似向艾歷臣唸咗「你睇我唔到」咁隱咗形；但咪開心得咁早，因為「老江湖」艾歷臣雖然曾經老貓燒鬚，俾英國《太陽報》記者假扮嘅中東油王呃到，但休息近1年後，佢對「天眼通」已恢復9成功力，今次又點會咁易被催眠呢？
英國《泰晤士報》就列出艾歷臣清洗大名單，包括哥拉廸、森馬拉斯、廸高夫、達保、韋化、夏文同孫繼海。以目前情況睇嚟，老孫都死咗7成；除非，他信同艾歷臣份約傾唔掂由第二個執教，不過，呢個可能性等如三叔（吳孟達）做賭王咁高喇！
不過，我求大俠亦希望孫繼海喺今次亞洲盃打出身價波，甚至幫球隊捧盃而回，到時咪話曼城想留佢，或者隔籬嗰間曼聯都排住隊買佢啦！