谷祖琳（細Joe）早前遭喪弟之痛，佢細佬谷祖堯因抑鬱病發跳樓身亡，不過細Joe好快堅強起嚟投入工作，噚晚佢同林一峰、趙學而等喺演藝學院重演舞台劇《一期一會》。
噚日晏晝馮仁昭特登去睇佢哋綵排，咁啱劇入面都有一對姊弟角色，其中一場戲講個家姐憶述細佬自殺經過，其他演員包括細Joe圍坐喺旁邊傾聽，可能感同身受，細Joe份外投入，係全部演員中最快流淚嘅一個，而且係真喊㖭，搞到現場氣氛好傷感。
趙學而傷癒復演
上次因腳傷無法演出嘅趙學而，已經傷癒重踏舞台，佢今次學精好多，着住平底密頭鞋，減低撞親受傷嘅機會，佢同戲中男友嘅親吻戲全部保留，只係有一場講佢兩個甜蜜打高爾夫球嘅戲改咗變睇星星，唔知係咪減少郁動以免影響佢嘅腳患。
眾演員綵排完畢一齊喺後台上香切燒豬，祈求演出順利，林一峰可能少拜神，佢攞住三支大香插入香爐，有兩支跌咗落地，而谷祖琳上完香，冇切燒豬就急急返入後台。
