Jerry：
曾幾何時，你是我生命的全部，我對你之迷戀已達不能自拔地步。為何選中我？為何瞞騙我？為何傷害我？我的愛是那麼不堪一擊嗎？
不能原諒你的欺詐，亦不能原諒自我的無知。今天，我決意拋開所有，將一切畫上休止符！
我對這決定絕不後悔，希望你也一樣。
永別了，MyLove
Aelly
記者：徐影龍
協力：鄭達基
攝影：譚盈傑、黃子偉
演出：Aelly@FREEZE
服裝：Amuleto
髮型：C.Wong@tripleedge
鳴謝：富利堡
嬌小玲瓏劈彎一流
LotusEliseR，為系列中最猛一員，單單是引擎用回Celica那台1.8VVTL-i，已比S系中嘅MR-S偈勝出一截，馬力更由136匹暴升至192匹！千祈咪睇少多出嚟呢56匹，因為車身僅重860kg，故馬力表現可作幾何級跳升，達致車輕偈勁嘅「雙優勢」局面。
車款賣相方面，LotusElise一向招搖搶眼，細細架但喺馬路上就霸氣十足，而且攻彎靈活，遇到連續彎位都毋須「收到阿媽都唔認得」。今日呢款「白裏透紅」R系列，乃經過多方改裝嘅Sport版，中間大大條白間，不但比傳統淨色系列更為威武，其底架、鋁合金軨等裝備，均經過偷輕及優化，鬥頭段爆炸力一啲都唔輸蝕，而波箱更由S系列之5前速增至6前速手動波箱，片彎、直路快放絕對更得心應手。
少女日記
風和日麗，懷着複雜心情，駛着愛驅EliseR直奔上山。
天氣這麼動人，不期然想起跟你甜蜜的點點滴滴。
你說偏愛紅色耀眼刺激感，我義無反顧地認同。
家中魚缸花盡心思，努力拼出血紅色彩。
外地公幹，每見到紅色建築物便令我心跳加速。
由喜歡黃玫瑰轉而渴望收到任何大紅花束。
尤其你在情人節贈送的高跟鞋，我更恨不得每天穿上。
你體貼地說蘋果對我有益，這大紅之物便成我每餐指定生果。
突然看到紅色電話亭，也不受控地停下、沉思……
回想花盡積蓄擁有這血紅戰驅，為的便是一心一意討好你……
生日那天，為何整天也等不到你親切的祝賀？
停在路邊思潮起伏，不情願地拿出你的致命武器，頃刻竟再次心如刀割！
世界像步入黑暗。
咬着唇，忍着痛，192匹馬力瘋狂爆發，直飆上山！
結局：這一切實在難以承受，決意了斷
從新出發
全心全意地愛你，換來恍如嘲弄我的欺騙，我決意擺脫一切，包括那對紅色高跟鞋，以及火紅戰車，跟你劃清界線，把你忘掉，不論前路有多艱苦……
LotusEliseRSport版規格
引擎：Celica1.8VVTL-i
馬力：192hp/7,800rpm
傳動：6前速手動波箱
0-100km/h：5.2秒
極速：241km/h
車輛提供：RichburgLotus（28770810）
Aelly
Aelly（陳樂榣）乃樂壇新進女子組合FREEZE三位成員之一，不但個個樣靚身材正，仲屬唱得跳得、極度活躍之美少女。而首次接觸Aelly，已被其大方好動性格所吸引，不拘小節得嚟亦甚有禮貌，予人相當好感。
FREEZE由一元製作一手發掘，首份工作便任《變靚D》代言人，亦為電影《醜女大翻身》配音。目前3人正努力灌錄唱片，派台歌便有《Maria》，加上廣告、密集式出席新城同TVB嘅Show，人氣度正日漸提升。
流汗花絮：3個大漢出力推
今日呢版好似冇乜字，咪以為筆者偷懶，查實由籌備到搵齊所需物品，都花咗唔少時間同心機，務求有視覺效果之餘，亦可砌到個較滿意嘅故事出嚟。現場拍攝更是苦不堪言，多位高手出力協助，曬到身水身汗不特止，仲要瘋狂餵蚊，個個好似Mark哥身中幾十槍咁轟烈，難得主角Aelly極力「忍痕」，幾隻蚊企喺背脊開餐，仍不哼一聲影埋佢！
最搞笑都係為方便微調EliseR嘅拍攝位置，又唔想下下着車郁車，惟有入個空波，再命令3條麻甩大漢慢慢推、慢慢移位，好彩架車夠輕，不致推到手軟。
今日初登場嘅Aelly，乃新進女子組合FREEZE嘅成員，下星期就輪到Carisa甄穎珊登場，如讀者對呢版有咩意見，歡迎電郵過嚟交流一下。
（[email protected]）
