港股果然夠陰濕，昨日先跌近兩百點，跟住抽高，反升278點，期指升幅仲大，升咗367點，如果計埋前日延長交易時段插到低水76點，就發覺好似一個局咁，造淡走唔切，又揩一鋪。
傳統藍籌好耐都冇咁威，長實（001）同和黃（013）一抽就係7巴仙同6.3巴仙，你話幾勁，滙控（005）都有近1巴仙升幅，同長實比較，新地（016）只升3巴仙，都幾失禮，不過，成個局就係，吽咗好耐嘅傳統大藍籌終於威番次，成為帶動大市上升嘅主力股份，咁嘅場面會唔會維持呢？長線就幾乎肯定係唔會，因為恒指成份股嘅結構已經唔同晒，係中資股話事，不過，咁耐冇開過party嘅大藍籌，難得有咁嘅機會，應該冇咁快停，下禮拜都仲會係佢哋嘅天下。
咁啲中資股會點？銀行股仲係強勢，工行（1398）同建行（939）會繼續炒，中行（3988）開始上力，遲啲會跟番啲步速。保險股造番好啲，但仲係整固緊。中交建（1800）就犀利嘞，好快已經逼近18元，個勢好好，應該唔使點唞就可以破關。
煤炭股急升之後唞咗1日，昨又見蠢動，中煤（1898）最有勢，下禮拜咪走雞。
中煤C輪1362：中煤昨收14.26元，最高見過14.78元，前日急升成交大增，昨日整支「破腳穿頭」，成交縮咗，下禮拜破15元炒上應該冇問題，破位先睇17元，可以買啲中煤C輪1362，隻輪昨收3.65元，槓桿率3.9倍（有效3.4倍），正股升上15元同17元，1362應該喺4.31同6.20元樓上，正股跌穿13.60元止蝕。