香港優質顧客服務協會第一屆CEO論壇，打頭陣講者係上任只有短短三日、啱啱由國泰COO轉咗做CEO嘅湯彥麟。湯彥麟講到國泰着重員工培訓、聆聽員工需要時，仲引述當年沙士點樣同員工共度時艱。
雖然沙士當日國泰冇出過聲話請食「豉椒炒魷」，不過員工都要勒緊褲頭，捱咗幾個禮拜nopaidleave嘅苦日子。國泰出名待員工不薄，市道復蘇後，即刻nopaid變番有paid，皆大歡喜。目前為止，國泰整體機艙服務員流失率係8%，佢好自豪咁話，流失率唔算太嚴重。
苗樂文讚米老鼠
海洋公園CEO苗樂文就做壓軸講者。佢話要帶動全體員工投入工作，先要高層同大家打成一片，先可以事半功倍。睇番佢哋入場人次由01年280萬躍升至今年預期嘅490萬，盈利亦由97年度嘅8000幾萬虧損，急升至06年度嘅1.57億盈餘，就知高層管理得好係幾咁緊要。
苗樂文仲好得體咁話，外界視為海洋公園大敵嘅米老鼠樂園，同海洋公園係complementary（互補）關係，多於competition（競爭），仲讚米老鼠帶嚟更多旅客，唔單止海洋公園，連整個香港都受惠。有咁識體面嘅高層，怪唔之得海洋公園越做越旺啦。
[email protected]