已婚的廣播處處長朱培慶前晚與艷女在銅鑼灣挽手同行，正好遇上一班在採訪鍾鎮濤（阿B）音樂會的記者，嚇得他落荒而逃。昨日阿B表示目擊朱培慶與記者追逐的經過，至於被指間接令朱培慶撞見記者，阿B苦笑說：「我都唔想㗎。」他又猜想朱培慶與友人看他表演，被記者嚇怕才逃走。
鍾鎮濤前晚在銅鑼灣伊利沙伯大廈的CDBar舉行「KennyB《日日是好日》LiveTour」音樂會，開騷前他接受訪問，然後稍作準備便上台表演。記者在酒吧外等候入場拍攝阿B獻唱時，正好撞破廣播處處長朱培慶與一名艷女挽手路過，他還嚇得瑟縮在女伴身後，然後落荒而逃。
張瑪莉教應對
阿B昨日接受電話訪問，他表示目擊朱培慶與記者追逐經過，他說：「我見到成班記者追住一男一女係咁影相，情況都幾混亂，我睇唔真個男人係邊個，問人又冇答案，卒之今朝睇報紙先知發生乜事。」有指阿B間接令朱培慶被傳媒撞破，他苦笑說：「吓？我都唔想㗎，酒吧門口貼晒我嘅宣傳海報，行過嘅都知我喺度開騷啦，佢會唔會係想同朋友嚟睇騷，點知俾班記者嚇親咋？或者嗰個係佢親戚朋友呢，唔好咁多心啦。」
曾為港台擔任節目《繩之於法》主持的張瑪莉，昨日在奧海城出席活動，談到朱培慶時說：「呢啲係私人事，冇嘢回應。」張瑪莉透露正替外交部和清華大學培訓學生如何應答，問到覺得朱培慶挽艷女一事會否影響其處長形象？她說：「叫佢打電話畀我教佢點答，呢件係佢嘅事，識處理。」
加薪演酒吧騷
此外，阿B本來只演兩場的酒吧騷，因反應熱烈，於本月27日加開一場，他說：「酬勞加咗少少，我唔會坐地起價，佢哋可能遲吓搵我做代言人呢。」阿B又謂有多個廣告斟洽中：「乜產品都冇所謂，錢多就得，尿布得，女人尿布都得。」阿B謂今年工作排得密麻麻，問他是否賺到盤滿缽滿？他謂：「唔得閒計呀，我講過搵1,000萬畀家人安全感，如果𠵱家要交1,000萬稅就仲正，證明賺得多。」
採訪：王連連
攝影：陳慧安
