生意難做！喺祖國講極都未有3G嘅時候，幾個網絡商惟有繼續加多兩錢肉緊，搶多啲2G客打底，咁點先可以喺2G市場搵到藍海突圍？不外乎係最有用同最實際嗰招──送嘢、送嘢、再送嘢囉！但送咩先夠出位搶到客呢？答案係只要同手機唔係好關事嘅就得！
好似聯通咁，為咗拉近同巨無霸中移動嘅距離，佢哋杭州分公司，先排就拍住華潤雪花啤酒浙江分公司，搞咗個「充值送啤酒，快樂齊分享！」嘅「鋪毛筍」，即係充值（內地手機要先增值先打到電話）就送你雪花啤酒，大概係50蚊人仔送12罐，一嚿水送24罐，兩嚿水就送48罐……計落分分鐘等於半價咁滯。
點解送啤酒？唔知，最大可能係天口熱啤酒可以消暑，飲多幾罐就可以傾耐啲，傾耐啲就要畀多啲電話費……而綜合內地傳媒嘅報道，佢哋話近排中移動同聯通其實鬥得非常激烈，好似喺好多地方齊齊推出超平嘅市民卡，仲配合五花八門嘅優惠，有啲地方就鬥收得平，有啲就鬥送禮，而送嘅禮品，經已到達「日常生活一網打盡」嘅境界！
你送18罐 我送24樽
好似喺江蘇嗰邊，聯通送51蚊一桶嘅食油，中移動就送75蚊大桶嘅，聯通送18罐啤酒，中移動就送24樽，而安徽嗰邊仲正，除咗油之外，仲有毛毯、保險、揮春，真係乜都有得送。
綜合各地戰況，兩間公司仲先後送過毛巾、遮同埋烹飪用具等等，只係北京老百姓好似最冇「福利」……唔知幾時呢個送禮潮會南下香港呢？
[email protected]