銅鑼灣賣8吋長魚生壽司賣到晚晚排人龍的昭陽，最近進駐紅磡開新店，咁高興，老闆Roy話劈價$1件8吋長壽司淨係益《蘋果》讀者；同場加映1呎長大蝦天婦羅、拳頭咁大的軟殼蟹……全部巨型Size，Unbelievable！差啲以為自己發夢去咗巨人國。
記者：趙珮倩
攝影：陳偉強
Model：Elaine&Stanley@綜藝社群
老闆Roy開宗明義話要走高質素食物，平民化路線，但咪以為賣$1的魚生壽司就會將貨就價，所有壽司魚生保證日本飛機貨，唔新鮮唔收錢。須知道捕魚出身的Roy，自家開設魚排，與漁民稔熟人際網絡廣，故日日攞到最新鮮的平靚正貨，佢夠膽講句同區日本料理店唔係對手，好似做活魚刺生的魚，一定要夠新鮮，未必間間日本料理肯做，但昭陽一日就賣二十幾條活魚，賣到量，自然來貨更平。
地方舒適闊落
新店設計以居酒屋為裝潢，跟銅鑼灣店感覺截然不同。以紅白色為主調，簡約摩登，地方闊落絕不侷促。全店一律以該店紅太陽的圓形Logo做設計圖案，一枱一椅、甚至一杯一碟，全是Roy親自設計，誠意十足。
1呎長大蝦天婦羅
新張益街坊價$28
攞咁大隻蝦做天婦羅真係大開眼界！日日由日本空運到港的1呎長大蝦，蘸上米通及天婦羅粉炸至輕薄，外層香脆，蝦肉鮮甜勁彈牙，搶手貨必試！
昭陽壽司出名係加大碼：魚生好似三文魚、八爪魚、吞拿魚、鰻魚等全部有8吋長，超過20款壽司，全部劈價賣$1件！
包房送牡丹蝦壽司船
精緻得唔捨得食落肚的牡丹蝦壽司船，壽司船以6吋長的新鮮牡丹蝦作為船身，上面放置5款每件只得1.5厘米長的迷你壽司，仲細過個1毫子，口感和味道與正常size的壽司一樣，盡顯壽司師傅的功力。現凡惠顧VIP房的顧客均可獲贈牡丹蝦壽司船1份。
炸沖繩 拳頭軟殼蟹$48
拳頭咁大的軟殼蟹，由沖繩直接入口，大廚話炸時油溫定要嚴格控制在180℃，才能保持蟹的鮮味甘脆，再蘸上沙律醬及冰凍晶瑩的蟹子同食，冰火口感，一試難忘。
活魚薄切料理$88-$128
活魚薄切，先要避開脊骨位的大動脈，再因應魚的肌理來切，時間、速度全要控制得準確，魚上枱時依然活生生！晶瑩剔透的魚片，伴以秘製清酒汁，酸酸咪咪，令肉質更爽脆鮮甜。
炸壽司拼盤$78/5件
飯糰蘸上脆漿再炸至外脆內軟，焦香煙韌。魚生有吞拿魚、魷魚、海膽、甜蝦和帶子，統統以火炙直接輕燙，令肉質更結實惹味，吃時蘸上碟邊的芥辣沙律醬，甜甜哋唔攻鼻！
食客有Say
Kitty：「呢度好多食物喺其他日本餐廳食唔到，好似牡丹蝦壽司船，啲迷你壽司好得意！」
阿欽：「魚生好新鮮，壽司超大件，食幾件都飽，地方闊落坐得舒服。」
食店資料：
昭陽日本料理居酒屋
地址：紅磡庇利街34-36A號地下
電話：23634442 座位：120個
營業時間：12:00nn-3pm及6pm-11pm
$1壽司優惠
1.優惠期由即日起至20/7/2007
2.只限原價$12或以下的壽司，每人限叫2件。
3.顧客在點菜時出示今日《蘋果日報》本版，即享此優惠，次數不限；影印本恕不接受。
4.如有任何爭議，昭陽保留最後決定權。
‧必須出示該版報紙才可以享有優惠。