泳兒噚日到商台拍攝MV，佢話日前錄音時將對鞋放喺門口，但錄完音就唔見咗對鞋，搞到佢最後要赤腳走落街截的士，最慘係當時落大雨，雙腳濕晒。泳兒話當日佢着嗰對鞋只係普通波鞋，唔覺得有人會偷。講到近日潮人追捧嘅AnyaHindmarch環保袋，泳兒話：「我未搵到人幫我買呢個袋呀，但係如果炒到好貴嘅話，我就唔會買住啦。」