葉翠翠噚日喺將軍澳電視廣播城接受訪問，有報道話佢媽咪患咗腎病，更話佢會做手術捐腎救阿媽，葉翠翠就唔願講太多媽咪嘅病情，但就直認有咁嘅意願，佢話：「我知道佢有呢個病幾個月，醫生話唔主張喺生人度攞個腎換，不過畀個腎媽咪係我嘅意願，我呢排成日去醫院係做檢查同了解多啲個手術。」