寶福集團由舊年7月停牌至今，其間正面消息近乎零，反而係管理層或主要股東內訌新聞就多籮籮。不過直到噚日，高層已經大換血，新任董事會主席由大中華國際投資主席兼匯通天下基金董事黃世再。新官上任三把火，黃世再話上任首要目標係申請復牌。
最玄妙之處就係兼任非執董嘅黃世再一個巴仙股份都冇喺手，咁點樣有話事權呢？原來佢同碧桂園主席楊國強一樣，都係「愛女大過天」，由年僅23歲嘅愛女黃文稀做單一大股東。
早喺今年5月28號，原為執董嘅第二大股東ChristianEmilToggenburger，將手上所有寶福股份轉手畀黃文稀。
而上任只有短短一個月嘅前主席兼執董張仲良就繼續留低，但轉咗做行政總裁。