華華噚日突然收到公關電話，話將成為首個華人英超球隊班主嘅楊家誠，開記者會同傳媒吹水。楊生不愧為近期封面人物，一時間港聞、體育同財經嘅記者及攝記，差唔多50人塞爆場。
楊生上月下旬入股泓鋒國際16.67%，成為最大股東，8日後即以泓鋒名義，用2.33億買入剛升上英超嘅伯明翰近3成股權，但熱愛足球嘅佢被問到點解唔直接啲用私人名義，要咁迂迴入股，只係話「下次先答你」。
唔知楊生係咪近排聽得多薛凱琪新歌「下次下次」，每逢有關泓鋒或敏感問題，一概耍手擰頭，通通都話「下次答、下次講、下次…」，一味大講波經，自然悶親財經記者，有行家退而求其次，問佢投資心得，大家都想知佢有乜秘笈或心得，可以喺十幾年前由開髮型屋，數年間搬上市值逾兩億嘅半山豪宅、坐600萬名車，仲一擲「億」金做英超球隊揸fit人。
直言低調嘅楊家誠未有透露第一桶金點嚟，只係講「我冇炒股好耐，不過有一間投資管理公司負責房地產、能源等相關項目。」翻查公司註冊處資料，楊家誠持有三家本地公司，包括超諾國際、環球資產管理及環球能源控股。
眼光人氣勁過超人
有行家問入股泓鋒算唔算炒股？華華於是㩒吓計數機，雖然呢兩日泓鋒回軟，噚日收報1.44蚊，但以楊生入股後計，股價已爆升1倍，而以楊生入股價0.57元計，半個月已有1.5倍回報，賬面勁賺成億銀。冇炒股都有咁嘅水準同成績，似乎楊生眼光同人氣仲勁過超人李嘉誠，超人上個月八度增持長實，但係股價郁都唔郁。
楊生講開以往對球員都幾好，咁對股東會唔會一樣咁好？佢好肯定講「一定會。」對於入主伯明翰，佢好有信心話：「回報都幾豐富，即使股東會唔通過，都會以私人名義入股做班主。」
[email protected]