長沙新鮮睇Nokia<br>女人手機　7月變鑽

長沙新鮮睇Nokia
女人手機　7月變鑽

送禮物畀女朋友，好自然想起：「送紅玫瑰好呀，實鍾意！」早就話你膚淺，人云亦云！揀手機都認為女性就只喜歡艷紅色，今次Nokia大唱反調，於長沙公布嘅最新型號7500Prism，僅推黑、白兩色，機身採用鑽石切割，按鍵變成一粒粒幾何圖形，高貴又精緻，今期女人手機仲唔係佢跑出？

記者、攝影：陳國輝

長沙直擊

■Nokia選址湖南國際影視會展中心舉行，離機場約30分鐘。

■新機之中以7500最搶鏡，機身好似用一粒粒鑽石砌成咁。

■全場最搶係佢，「切割位」仲會透出紫色光芒，靚到暈！

■場內放置4個飾櫃，以名貴手袋及化妝品襯托7500，成班女人唔捨得走。

■用女性飾物作為7500嘅設計概念，效果都唔錯。

■咪以為嚟呢度睇傳統文物，查實呢處係餐館入口，堅唔堅先？

黑鑽7月出籠　玩換邊

咪以為7500採用名貴靚料，仲會開天價發售！於鋼琴黑拋光面之下，每粒掣高低不平，質感有別，睇落已覺好Grand；第一次同佢「交手」，仲發現手感相當舒適，㩒掣打電話嗰刻，竟然冇唔適應嘅感覺，直教小記意外！為合乎鑽石造型，7500機身四邊角出現咗「磨平位」，至於機側彩帶仲可隨意更換，黑色版會搶先喺7月中推出，街價都係$2,000頭，送畀女朋友都抵啦！

■黑、白色感覺完全唔同，白色版未有推出時間。

■機底位置似唔似磨平咗嘅鑽石？見仁見智啦！

■換彩帶相當輕鬆，黑色版將附送藍及粉紅色兩款。

欠標青分唇　影相靚咗

中階機價位都未到，對功能要求當然不可太高！基本上，7500配備200萬像素相機、藍芽、插卡、FM……乜都有啲，算係交足貨；但勢估唔到，影相質素特別好。小記試過喺陽光充足下拍攝，無論有陽光曬到嘅地方抑或陰暗位，竟冇出現過度曝光或黑色一片嘅情況，整體表現均勻，另外想一提係音樂分唇幾強，內置均衡器調校音色之餘，仲有立體聲強化，都係嗰句，呢個價錢屬於幾抵玩。

試後感

拎上手嗰下，膠感重，稍為跌眼鏡！但數字掣由正方變三角，唔單止外觀上一大突破，手感仲Fit咗。尤其左右兩邊粒「選擇」和「取消」鍵，零舍尖起咗，勁到唔使望電話一樣㩒到！