「切勿沉迷賭博，如出現問題賭博行為，請致電XXX，尋求輔導協助。」大家係咪覺得呢句苦口婆心嘅警告，耳熟能詳但又唔知喺邊度聽過呢？查實你每日打開馬會網頁，都應該會見到，目的係希望各位仁兄落注時適可而止云云；不過，曼聯紅人基斯坦奴朗拿度（C朗），似乎未聽過，事關佢越賭越大，今次嘅賭注係無價寶－－頭髮！
我求大俠好記得前季，C朗人氣漸旺，夠膽同領隊費格遜誇下海口，賭50鎊（約790港元）自己可以一季聯賽射入10球，卒之先贏一鋪；C朗玩開有鋪癮，上季將賭注提升到同400鎊，打賭聯賽轟入15球以上，又贏！估唔到，C朗呢鋪「沉迷」賭海，費事俾人話「割禾青」，竟同老費講：「我入唔到20球就剃光頭，入到喇喎，你就要剃光頭喇！」
同老費打賭入20球
C朗密友透露，極之貪靚嘅C朗絕唔會拎頭髮「較飛」：「C朗信心爆晒棚，因為佢絕對唔會拿每日花幾小時打理嘅頭髮冒險。」全隊皆知，C朗愛靚唔愛命，更掏腰包喺更衣室自己安放私人「魔鏡」，賽前總係專心打扮一番，藉此增加自己比賽信心。
上季，C朗以17球衝線，贏咗老費幾千蚊；當然，對於佢哋呢啲每周賺百多萬嘅球星嚟講，區區幾千元事小，贏啖氣事大，但冇人估到C朗，竟然膽生毛到將父母受諸嘅一頭秀髮作「牙骱」戰，真係語不驚人死不休！
不過，C朗玩到咁大，𠵱家最擔憂嘅應該係全球「粉絲」，事關來季紅魔多咗幾件新兵，拿尼、安達臣奧利華拉等都間接減少了C朗嘅上陣機會，加上不可預測嘅傷患，20球真係唔易，今季神射手杜奧巴都係入20球喳！假如……只係假如啫，C朗真係入唔到20球，「粉絲」隨時上街絕食抗議兼聯署寫信要求保留「C朗秀髮」都似。