3個成日騰騰震的蒙面俠（WonderfulMan）跟BEAMST大玩交叉，更於上星期到港大搞巡迴展覽第2站。主腦加藤力也還即場為Fans以絲網印Tee，一小時已賣清40件特別版，反應熱烈。兩個老細見狀笑到見牙唔見眼，還齊齊興起扮WonderfulMan的招牌投降手勢。不過要大叫投降的，應該係一眾狂掃展品的粉絲們先啱！
記者：許維雅
攝影：林栢鈞
香港係巡迴第二站
於93年成立的日本品牌WDW（TheWonderful！DesignWorks），當中3個成日騰騰震的蒙面儍俠（WonderfulMan）可以話係品牌最重要角色，再配合最新反派角色Yoshiro的搞笑演繹，為品牌帶出不少歡樂。BEAMST最近邀請WDW合作出Tee，卻以即場絲網手印Tee進行發售，原宿第一站反應熱烈，來到香港墟冚情況不遑多讓。兩個單位齊齊出手，香港又增加了不少Fans成為捧場客。
即場絲網印Tee40件！
WDW×BEAMST巡迴展覽共3站，分別為原宿、香港及大阪，加藤力也都會親身為Fans以絲網技術即場印Tee。每個過程都落足心機，與機印Tee不可同日而語。雖然要等30分鐘左右，但$259的價錢就可換得偶像心血，等幾耐都冇所謂啦！
限定品首日沽清
WDW展覽至7月14日，新港中心的BEAMST都會擺放全WDW的作品，更有不少係香港展覽限定品，不過大部份的限定品於展覽首日已經賣清。會場其實都係半展覽形式進行，只有兩部扭蛋機及投射銀幕不停播放WDW作品為佈置，滿足一眾Fans。
潮友即場搶購
Derek
「我冇買開佢哋啲Tee，不過見到雜誌介紹今次個Event，所以專誠過嚟睇吓。覺得個Print幾靚，價錢又OK，所以即刻買番件。」
Alex
「我有買開BEAMST啲Tee，WDW呢個牌子就唔係太熟。行開見到個Print啲公仔好得意、好新鮮，估唔到佢價錢咁抵，200幾蚊，根本毋須考慮。」
Man
「我見到雜誌介紹WDW×BEAMS，所以過嚟睇吓。喺日本都有買過WDW嘅玩具，衫就未買過，見到個Print咁得意，200幾蚊嘅價錢都OK！」
Anita
「我做Design，欣賞WDW嘅設計有性格。知道佢今日會嚟印Tee，機會好難得，好少有Artist咁做，所以特登過嚟買同搵佢合照。」
店舖查詢：
BEAMST（29920235）
尖沙嘴新港中心二樓27號舖